អ្នកស្រុកនៅតំបន់ហ្គាហ្សាជាង ១លាននាក់ត្រូវបានបង្ខំឱ្យចាកចេញពីផ្ទះរបស់ពួកគេ

បរទេស៖ ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ជិតបូព៌ា (UNRWA) បាននិយាយនៅក្នុងសេចក្តីថ្លែងការណ៍មួយថា មនុស្សជាង ១លាននាក់ត្រូវបានបង្ខំឱ្យចាកចេញពីផ្ទះរបស់ពួកគេនៅក្នុងតំបន់ហ្គាហ្សាស្ទ្រីបដោយសារតែការបាញ់ផ្លោងដ៏ខ្លាំងក្លារបស់អ៊ីស្រាអែលពីតំបន់ជុំវិញនោះ។

ទីភ្នាក់ងារនោះបាននិយាយថា «មនុស្សជាង ១លាននាក់ ដែលស្ទើរតែពាក់កណ្តាលនៃចំនួនប្រជាជនសរុបនៃតំបន់ហ្គាហ្សា ត្រូវបានផ្លាស់ទីលំនៅ។ នៅក្នុងចំនួននោះ ប្រហែល ៦០០.០០០នាក់នៃជនភៀសខ្លួនផ្ទៃក្នុង (IDPs) ស្ថិតនៅក្នុងតំបន់កណ្តាល តំបន់ខាន់យូនីស និងតំបន់រ៉ាហ្វាហ៍ ហើយប្រជាជនប្រមាណជិត ៤០០.០០០នាក់ស្ថិតនៅក្នុងកន្លែងរបស់ទីភ្នាក់ងារ UNRWA ដែលច្រើនលើសពីសមត្ថភាពរបស់យើង ដើម្បីជួយពួកគេ ដែលរួមទាំងទីជម្រក អាហារ ទឹក ឬជំនួយផ្លូវចិត្តជាដើម»។

លើសពីនេះទៀត ទីភ្នាក់ងារ UNRWA បានបញ្ជាក់ពីការស្លាប់បុគ្គលិករបស់ខ្លួនចំនួន ១៤នាក់នៅក្នុងតំបន់ហ្គាហ្សា ដោយបានកត់សម្គាល់ថា ចំនួននេះមិនមែនជាតួលេខចុងក្រោយទេ ហើយវាអាចនឹងមានការកើនឡើងបន្ថែមទៀត៕

ប្រភព៖ AKP