បរទេស៖ ក្រសួងទេសចរណ៍ និងកីឡារបស់ប្រទេសថៃគ្រោងនឹងប្រើប្រាស់ថវិកាចំនួន ៦០០លានបាត (១៦លានដុល្លារអាម៉េរិក) ពីថវិកាកណ្តាលរបស់ខ្លួន ដើម្បីលើកកម្ពស់វិស័យទេសចរណ៍ក្នុងរដូវកាលទេសចរណ៍មមាញឹកនេះ ខណៈដែលការបញ្ចេញថវិកាសារពើពន្ធឆ្នាំ២០២៤ ត្រូវបានគេរំពឹងថានឹងពន្យារពេលរហូតដល់ខែមេសាឆ្នាំក្រោយ។
រដ្ឋមន្ត្រីក្រសួងទេសចរណ៍ និងកីឡាថៃ លោកស្រី ស៊ូដាវ៉ាន់ វ៉ាងស៊ូផាគីជកុសល បាននិយាយថា ថវិកាដែលបានស្នើឡើងនឹងត្រូវបែងចែកទៅឱ្យអាជ្ញាធរទេសចរណ៍ថៃ (TAT) សម្រាប់ការផ្សព្វផ្សាយរបស់ខ្លួន ដោយចាប់ផ្តើមពីត្រីមាសទី៤ ក្នុងឆ្នាំនេះ រហូតដល់ត្រីមាសទី១ ឆ្នាំ២០២៤ ។
គម្រោងផ្សព្វផ្សាយសំខាន់ៗរួមមាន កម្មវិធីអភ័យឯកសិទ្ធិលិខិតឆ្លងដែនថៃដ៏អស្ចារ្យ ដែលទាមទារថវិកាចំនួន ១៥០លានបាត ដើម្បីផ្សព្វផ្សាយប្រទេសថៃជាប្រទេសគោលដៅទិញទំនិញដែលពេញនិយម ខណៈដែលថវិកាចំនួន ១៥០លានបាតផ្សេងទៀតត្រូវបានបែងចែកសម្រាប់យុទ្ធនាការទីផ្សារសម្រាប់ទីផ្សារអន្តរជាតិទាំងអស់។
ថវិកាប្រហែល ២០០លានបាតនឹងត្រូវបានប្រើប្រាស់សម្រាប់យុទ្ធនាការបទពិសោធន៍នៃពិធីបុណ្យរបស់ប្រទេសថៃ ដោយផ្សព្វផ្សាយពិធីពិធីបុណ្យធំៗនៅទូទាំងតំបន់ចំនួន៥។
លោកស្រីបាននិយាយថា ថវិកាដែលនៅសល់នឹងត្រូវបានប្រើប្រាស់ដល់យុទ្ធនាការក្នុងស្រុកមួយដែលមានឈ្មោះថា «ការតភ្ជាប់តំបន់ទៅនឹងសកលលោក» ដែលមានបំណងជំរុញដល់ការធ្វើដំណើរឆ្លងកាត់តំបន់។
យោងតាមលោកស្រី ស៊ូដាវ៉ាន់ បានឱ្យដឹងថា គម្រោងទាំងនោះអាចត្រូវបានចងភ្ជាប់ទៅនឹងពិធីបុណ្យសំខាន់ៗជាច្រើនក្នុងរដូវទេសចរណ៍មមាញឹកនេះ ដែលរួមមានទាំងពិធីបុណ្យបណ្តែតប្រទីប ការរាប់ថយក្រោយអបអរឆ្នាំថ្មី ឆ្នាំសកល និងពិធីបុណ្យចូលឆ្នាំចិន ហើយថែមទាំងអាចបន្តដល់ថ្ងៃបុណ្យសង្រ្កាន នៅក្នុងខែមេសាផងដែរ។
លោកស្រីបាននិយាយថា ក្រសួងបានដាក់សំណើរបស់ខ្លួនទៅកាន់លេខាធិការដ្ឋានគណៈរដ្ឋមន្រ្តីរួចរាល់ហើយ និងកំពុងរង់ចាំការអនុម័តពីគណៈរដ្ឋមន្ត្រី។
ក្រសួងក៏បានពិភាក្សាអំពីលទ្ធភាពនៃការអនុញ្ញាតឱ្យប្រជាពលរដ្ឋប្រើប្រាស់ថវិកាពីកាបូបប្រាក់ឌីជីថលដែលមានចំនួន ១០.០០០បាតរបស់ពួកគេ ដែលគ្រោងនឹងដាក់ឱ្យប្រើប្រាស់នៅក្នុងខែកុម្ភៈ សម្រាប់ការចំណាយទៅលើវិស័យទេសចរណ៍ផងដែរ៕
ប្រភព៖ AKP
