បរទេស៖ ទីភ្នាក់ងារសារព័ត៌មានក្នុងតំបន់បានរាយការណ៍ថា រដ្ឋមន្ត្រីការបរទេសអ៊ីរ៉ង់ លោក ហូសសេន អាមីរ៉ាប់ដុលឡាហៀន បានជួបពិភាក្សាជាមួយប្រធានការិយាល័យនយោបាយនៃក្រុមហាម៉ាស់ លោក អ៊ីស្ម៊ែល ហានីយ៉េហ៍ នៅក្នុងប្រទេសកាតា និងបានពិភាក្សាអំពីស្ថានភាពជុំវិញជម្លោះរវាងប៉ាឡេស្ទីន និងអ៊ីស្រាអែល ក៏ដូចជាកិច្ចខិតខំប្រឹងប្រែងការទូតដើម្បីបញ្ចប់អរិភាព។
នៅដើមសប្តាហ៍មុន លោក អាមីរ៉ាប់ដុលឡាហៀន បានទៅបំពេញទស្សនកិច្ចជាផ្លូវការទៅកាន់បណ្តាប្រទេសនៅមជ្ឈិមបូព៌ា ដូចជាប្រទេសអ៊ីរ៉ាក់ លីបង់ និងស៊ីរី ហើយកាលពីថ្ងៃសុក្រ រដ្ឋមន្ត្រីអ៊ីរ៉ង់បានជួបពិភាក្សាជាមួយលោក ហាស់សាន់ ណាស់រ៉ាល់ឡាហ៍ ប្រធានចលនាឥស្លាមហេបូឡា Shia របស់ប្រទេសលីបង់ នៅក្នុងទីក្រុងបេរូត។
កាលពីថ្ងៃទី៧ ខែតុលា ក្រុមហាម៉ាស់ប៉ាឡេស្ទីនបានបើកការវាយប្រហារដោយគ្រាប់រ៉ុក្កែតទ្រង់ទ្រាយធំដ៏គួរឱ្យភ្ញាក់ផ្អើលមួយប្រឆាំងនឹងអ៊ីស្រាអែលពីតំបន់ហ្គាហ្សាស្ទ្រីប ដែលជំរុញឱ្យអ៊ីស្រាអែលប្រកាសស្ថានភាពនៃសង្រ្គាមនៅថ្ងៃបន្ទាប់ និងបើកការវាយប្រហារសងសឹកវិញ។ កាលពីថ្ងៃចន្ទ អ៊ីស្រាអែលបានបញ្ជាឱ្យបិទផ្លូវទាំងស្រុងនៃតំបន់ហ្គាហ្សាស្ទ្រីប ដែលមានប្រជាជនរស់នៅជាង ២លាននាក់ ដោយបានកាត់ផ្តាច់ការផ្គត់ផ្គង់ទឹក អាហារ និងប្រេងឥន្ធនៈ។ ទាំងអ៊ីស្រាអែល និងប៉ាឡេស្ទីនបានរាយការណ៍ថា មានមនុស្សស្លាប់ជាង ១.០០០នាក់ និងរាប់ពាន់នាក់ផ្សេងទៀតបានរងរបួស ដែលជាលទ្ធផលនៃការកើនឡើងភាពតានតឹងនេះ៕
ប្រភព៖ AKP
