បរទេស៖ ក្រសួងការបរទេសប៉ាឡេស្ទីនបានសរសេរនៅលើបណ្តាញសង្គមអ៊ិច ដែលពីមុនត្រូវបានគេស្គាល់ថាជាបណ្តាញសង្គមធ្វីតធើរថា យ៉ោងហោចណាស់អាគារស្នាក់នៅចំនួន ២២.៦៣៩ខ្នង និងមន្ទីរពេទ្យចំនួន១០ ត្រូវបានបំផ្លាញដោយការវាយប្រហារតាមអាកាសរបស់អ៊ីស្រាអែលទៅលើតំបន់ហ្គាហ្សាស្រ្ទីប។
យោងតាមការរាយការណ៍នោះបានឱ្យដឹងថា សាលារៀនក្នុងស្រុកសរុបចំនួន៤៨ ក៏ត្រូវរងការខូចខាតផងដែរ។
យោងតាមប្រភពដែលបានដកស្រង់ដោយប៉ុស្តិ៍ទូរទស្សន៍អាល់ អារ៉ាប៊ីយ៉ា បានឱ្យដឹងថា អគ្គិសនី និងសេវាអ៊ីនធើណេតត្រូវបានកាត់ផ្តាច់។
ភាពតានតឹងចុងក្រោយបំផុតនៅមជ្ឈិមបូព៌ាត្រូវបានបង្កឡើងដោយការវាយប្រហារកាលពីថ្ងៃទី៧ ខែតុលា របស់ពួកសកម្មប្រយុទ្ធហាម៉ាស់ទៅលើទឹកដីនៃប្រទេសអ៊ីស្រាអែល។ យោងតាមរបាយការណ៍ចុងក្រោយបានឱ្យដឹងថា ការប៉ះទង្គិចគ្នា និងការបាញ់ផ្លោងបានធ្វើឱ្យប្រជាជនប៉ាឡេស្ទីនប្រហែល ៩០០នាក់បានស្លាប់ និងជាង ៤.៥០០នាក់បានរងរបួស ហើយជនជាតិអ៊ីស្រាអែលជាង ១.០០០នាក់បានស្លាប់ និងជាង ៣.៤០០នាក់បានរងរបួស។
ក្រុមហាម៉ាស់បាននិយាយថា ការវាយប្រហាររបស់ខ្លួន គឺដើម្បីឆ្លើយតបទៅនឹងសកម្មភាពរបស់អាជ្ញាធរអ៊ីស្រាអែលដែលប្រឆាំងនឹងវិហារអ៊ីស្លាមអាល់-អាកសា នៅក្នុងទីក្រុងហ្សេរុយសាឡឹម។ ប្រទេសអ៊ីស្រាអែលបានប្រកាសអំពីស្ថានភាពត្រៀមខ្លួនសម្រាប់សង្គ្រាម និងសម្រាប់ការឡោមព័ទ្ធទាំងស្រុងនៃតំបន់ហ្គាហ្សាស្រ្ទីប៕
ប្រភព៖ ទីភ្នាកង់ារសារព័ត៌មានកម្ពុជា
