បរទេស៖ ក្រុមហ៊ុនប្រេង និងឧស្ម័នឥណ្ឌូណេស៊ី PT Pertamina បានចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយក្រុមហ៊ុន Guma Africa Group Limited ស្តីពីការបង្កើតសម្ព័ន្ធភាពដើម្បីស្វែងរកគម្រោងដែលមានសក្តានុពលនៅក្នុងអាជីវកម្មប្រេង និងឧស្ម័ននៅក្នុងទ្វីបអាហ្វ្រិក។
អគ្គនាយកក្រុមហ៊ុន Pertamina លោកស្រី នីគកេ វីដយ៉ាវ៉ាទី ត្រូវបានដកស្រង់សម្តីដោយប្រព័ន្ធផ្សព្វផ្សាយក្នុងស្រុកដែលបាននិយាយថា ក្រុមហ៊ុនសង្ឃឹមថានឹងអាចអនុវត្តសមត្ថភាព និងបទពិសោធន៍ដែលក្រុមហ៊ុន Pertamina មាននៅក្នុងប្រទេសឥណ្ឌូណេស៊ី នៅក្នុងទ្វីបអាហ្វ្រិក។
កិច្ចព្រមព្រៀងនេះត្រូវបានគេរំពឹងថានឹងផ្តល់លទ្ធភាពឱ្យប្រទេសឥណ្ឌូណេស៊ី និងបណ្តាប្រទេសនៅអាហ្រ្វិកបង្កើនឱកាសដើម្បីសម្រេចបាននូវកំណើនសេដ្ឋកិច្ច និងសន្តិសុខថាមពលទាំងនៅក្នុងប្រទេសឥណ្ឌូណេស៊ី និងទ្វីបអាហ្វ្រិក។
ទន្ទឹមនឹងនេះដែរ ប្រធានប្រតិបត្តិនៃក្រុមហ៊ុន Guma Africa Group Limited លោក រ៉ូបឺត ហ្គូម៉េដេ បាននិយាយថា ការចុះហត្ថលេខានេះ គឺជាសន្ទុះដ៏អស្ចារ្យមួយ។ លោកបាននិយាយថា ក្រុមហ៊ុន Pertamina នឹងជួយដល់អាហ្រ្វិកទាក់ទងនឹងការរុករក ការកែច្នៃ និងការនាំចូលផលិតផលធនធានធម្មជាតិ។
លោក ហ្គូម៉េដេ បាននិយាយថា ក្រុមហ៊ុននឹងអនុវត្តបទពិសោធន៍ដែលបានរៀនពីក្រុមហ៊ុន Pertamina នៅក្នុងបណ្តាប្រទេសដែលប្រភពប្រេង និងឧស្ម័ន និងថាមពលកកើតឡើងវិញច្រើននៅក្នុងទ្វីបអាហ្រ្វិក។ លោកបានសម្តែងការរីករាយ ដែលវាជាកិច្ចសហការដែលមានផលប្រយោជន៍ទៅវិញទៅមក។
ក្នុងអំឡុងពេលនៃដំណើរទស្សនកិច្ចរបស់មន្ត្រីក្រុមហ៊ុន Pertamina ទៅកាន់ទ្វីបអាហ្រ្វិក រួមជាមួយនឹងដំណើរទស្សនកិច្ចរបស់ប្រធានាធិបតីឥណ្ឌូណេស៊ី លោក ចូកូ វីដូដូ បានផ្តួចផ្តើមនូវកិច្ចសហប្រតិបត្តិការជាមួយដៃគូធុរកិច្ចជាច្រើននៅក្នុងទ្វីបអាហ្រ្វិកសម្រាប់ការអភិវឌ្ឍប្រេង និងឧស្ម័ន រួមទាំងប្រភពថាមពលកកើតឡើងវិញ និងថ្មី ដូចជាថាមពលកំដៅក្នុងផែនដីជាដើម។
ក្រុមហ៊ុន Pertamina បានប៉ាន់ប្រមាណថា ការវិនិយោគដែលមានសក្តានុពលសរុបនៅក្នុងកិច្ចសហប្រតិបត្តិការនេះ មានចំនួនប្រមាណ ២,៦ប៊ីលានដុល្លារអាម៉េរិក។ កិច្ចសហការនេះត្រូវបានធ្វើឡើងនៅក្នុងប្រទេសកេនយ៉ា តង់ហ្សានី ម៉ូសំប៊ិក និងអាហ្វ្រិកខាងត្បូង សំដៅបង្កើនផលិតកម្ម និងតួនាទីរបស់ក្រុមហ៊ុន Pertamina ក្នុងការផ្លាស់ប្តូរថាមពល៕
ប្រភព៖ ទីភ្នាក់ងារសារព័ត៌មានកម្ពុជា
