បរទេស៖ ប្រទេសឥណ្ឌូណេស៊ីគ្រោងនឹងចុះអនុស្សរណៈនៃការយោគយល់គ្នាមួយជាមួយប្រទេសម៉ាឡេស៊ីដើម្បីអភិវឌ្ឍរោងចក្រផលិតអាគុយយានយន្តអគ្គិសនី (EV) នៅសួនឧស្សាហកម្មសាម៉ាឡាជូ។ នេះបើយោងតាមកុងស៊ុលរបស់ឥណ្ឌូណេស៊ីប្រចាំនៅទីក្រុងគូជីងនៃប្រទេសម៉ាឡេស៊ី លោក រ៉ាដេន ស៊ីគីត វីតចាកសូណូ។
រោងចក្រនោះនឹងប្រើប្រាស់ថាមពលដែលបានបង្កើតឡើងនៅក្នុងរោងចក្រវារីអគ្គិសនីដែលមានទីតាំងនៅទីក្រុងបាគុននៃរដ្ឋសារ៉ាវ៉ាក់របស់ប្រទេសម៉ាឡេស៊ី។
អ្នកការទូតឥណ្ឌូណេស៊ីរូបនោះបាននិយាយថា រាប់ទសវត្សកន្លងមក ឥណ្ឌូណេស៊ីបានសហការជាមួយរដ្ឋសារ៉ាវ៉ាកសម្រាប់វិស័យរោងចក្រវារីអគ្គិសនី។ ជាពិសេស ខេត្តកាលីម៉ាន់តាន់ខាងលិចរបស់ប្រទេសឥណ្ឌូណេស៊ីបានទិញអគ្គិសនីពីរោងចក្រវារីអគ្គិសនីដែលមានទីតាំងនៅក្នុងរដ្ឋសារ៉ាវ៉ាក់។
លើសពីនេះទៀត រដ្ឋាភិបាលរដ្ឋសាវ៉ាក់បានផ្តល់ការគាំទ្រដល់ការអប់រំសម្រាប់កុមារនៃពលករចំណាកស្រុកឥណ្ឌូណេស៊ី។
ទីភ្នាក់ងារសារព័ត៌មានឥណ្ឌូណេស៊ីអាន់តារ៉ាបានដកស្រង់សម្តីរបស់លោក ស៊ីគីត ដែលបាននិយាយថា ប្រទេសឥណ្ឌូណេស៊ីនៅតែបន្តលើកកម្ពស់ប្រព័ន្ធអេកូឡូស៊ីដែលមានផលប្រយោជន៍ទៅវិញទៅមករវាងភ្នាក់ងារចំណាកស្រុកឥណ្ឌូណេស៊ី និងទីភ្នាក់ងាររបស់ឥណ្ឌូណេស៊ី និងរដ្ឋសារ៉ាវ៉ាក់។
កាលពីខែឧសភា ប្រធានាធិបតីឥណ្ឌូណេស៊ី លោក ចូកូ វីដូដូ និងប្រធានរដ្ឋសារ៉ាវ៉ាក់របស់ប្រទេសម៉ាឡេស៊ី បានបំបែកគម្រោងវារីអគ្គិសនីនៅក្នុងខេត្តកាលីម៉ាន់តាន់ខាងជើងដែលមានសមត្ថភាព ១.៣៧៨មេហ្គាវ៉ាត់។ រដ្ឋសារ៉ាវ៉ាក់បានចូលរួមចំណែក ២៥% នៃតម្លៃវិនិយោគ៕
ប្រភព៖ ទីភ្នាកង់ារសារព័ត៌មានកម្ពុជា
