បរទេស៖ រដ្ឋមន្ត្រីក្រសួងសម្របសម្រួលកិច្ចការសមុទ្រ និងការវិនិយោគរបស់ប្រទេសឥណ្ឌូណេស៊ី លោក លូហ៊ុត ប៊ីនសារ ប៉ាន់ចៃតាន់ បាននិយាយកាលពីថ្ងៃទី២៧ ខែកញ្ញាថា រដ្ឋាភិបាលរបស់ប្រទេសឥណ្ឌូណេស៊ីបានកំណត់គោលដៅលើគម្រោងផ្លូវរថភ្លើងធុនស្រាល (LRT) នៅលើកោះបាលី ដើម្បីចាប់ផ្តើមបើកការដ្ឋានសាងសង់នៅដើមឆ្នាំ២០២៤។
លោកបាននិយាយបន្តថា ការសិក្សានេះត្រូវបានអនុវត្តជាយូរមកហើយ ប៉ុន្តែត្រូវបានរារាំងដោយសារជំងឺរាតត្បាតកូវីដ-១៩។
លោក ប៉ាន់ចៃតាន់ បានកត់សម្គាល់ថា ផ្លូវរថភ្លើង LRT នឹងឆ្លងកាត់អាកាសយានដ្ឋាន ហ្គូស្ទី ងូរ៉ាហ៍រ៉ៃ ១ និងសម្រាប់អ្នកដំណើរមកពី និងទៅអាកាសយានដ្ឋាននោះ។ ដោយមិនមានផ្លូវរថភ្លើង LRT ការកកកុញអ្នកដំណើរនឹងកើតឡើងនៅក្នុងឆ្នាំ២០២៦ ខាងមុខ ដោយសារការពិចារណាថា អាកាសយានដ្ឋាននោះនឹងទទួលបានអ្នកដំណើរប្រហែល ២៤លាននាក់ក្នុងមួយឆ្នាំ។
លោករដ្ឋមន្ត្រីក៏បានបញ្ជាក់ផងដែរថា នៅក្នុងកិច្ចប្រជុំមួយ លោកប្រធានាធិបតី ចូកូ វីដូដូ បានបញ្ជាឱ្យរដ្ឋមន្ត្រីធ្វើការសិក្សាបន្ថែមទៀតសម្រាប់ផ្លូវរថភ្លើង LRT កោះបាលី ពីអាកាសយានដ្ឋានងូរ៉ាហ៍រ៉ៃ ទៅកាន់តំបន់រមណីយដ្ឋានសេមីនយ៉ាក ឬបន្តទៅកាន់តំបន់រមណីយដ្ឋានភូមិកាងហ្គូ ដែលមានប្រវែងសរុបប្រហែល ២០គីឡូម៉ែត្រ។
លោកបាននិយាយបន្ថែមថា «យើងគ្រោងនឹងគិតថ្លៃសំបុត្រប្រហែល ១-២ដុល្លារអាម៉េរិកសម្រាប់អ្នកដំណើរតាមយន្តហោះម្នាក់ៗ មិនថាពួកគេប្រើផ្លូវរថភ្លើង LRT ឬក៏អត់នោះទេ។ ដូច្នេះ ការផ្តល់ហិរញ្ញប្បទានសាធារណៈនេះអាចគាំទ្រដល់ប្រតិបត្តិការផ្លូវរថភ្លើង LRT»៕
ប្រភព៖ ទីភ្នាក់ងារសារព័ត៌មានកម្ពុជា
