បរទេស៖ ទិន្នន័យរបស់ធនាគារកណ្តាលរបស់ប្រទេសកូរ៉េខាងត្បូងបានបង្ហាញកាលពីថ្ងៃពុធថា លក្ខខណ្ឌពាណិជ្ជកម្មរបស់ប្រទេសកូរ៉េខាងត្បូងបានកើនឡើងសម្រាប់ខែទី៣ ជាប់ៗគ្នាកាលពីក្នុងខែសីហា ដោយសារតម្លៃនាំចូលបានធ្លាក់ចុះក្នុងល្បឿនលឿនជាងតម្លៃនាំចេញ។
យោងតាមទិន្នន័យបឋមពីធនាគារកូរ៉េ (BOK) បានឱ្យដឹងថា សន្ទស្សន៍លក្ខខណ្ឌពាណិជ្ជកម្មសុទ្ធរបស់ប្រទេសនេះសម្រាប់ទំនិញដែលជារង្វាស់នៃលក្ខខណ្ឌពាណិជ្ជកម្មសរុបមានចំនួន ៨៧,៦៧ កាលពីខែមុន ដោយកើនឡើងបាន ៤,៤% ធៀបនឹងឆ្នាំមុន។
ធនាគារ BOK បាននិយាយថា ការធ្វើឱ្យប្រសើរឡើងនៅក្នុងខែសីហាបានធ្វើឱ្យតម្លៃនៃការនាំចូលធ្លាក់ចុះ ១២,៨% ធៀបនឹងឆ្នាំមុន ខណៈដែលតម្លៃនាំចេញបានធ្លាក់ចុះ ៨,៩%។
ការនាំចេញទៅក្រៅប្រទេសបានធ្លាក់ចុះ ៨,៤% មកនៅត្រឹម ៥១,៨៧ប៊ីលានដុល្លារអាម៉េរិកកាលពីខែមុន។
ការធ្លាក់ចុះនេះបានកើតឡើងដោយសារការនាំចេញគ្រឿងអេឡិចត្រូនិក ដែលជាមុខទំនិញនាំចេញសំខាន់របស់ប្រទេសកូរ៉េខាងត្បូង ព្រមទាំងការធ្លាក់ចុះ ២១% ទៅលើតម្រូវការ និងការធ្លាក់ចុះនៃតម្លៃបន្ទះឈីប ផលិតផលប្រេងក៏បានធ្លាក់ចុះ ៣៥% ដែរ៕
ប្រភព៖ ទីភ្នាក់ងារសារព័ត៌មានកម្ពុជា
