បរទេស៖ ប្រធានក្រុមប្រឹក្សាប្រឹក្សាធុរកិច្ចអាស៊ាន (ABAC) លោក អាសចាដ រ៉ាស់ជីដ បាននិយាយថា បណ្តាក្រុមហ៊ុននៅអាស៊ីអាគ្នេយ៍កំពុងវាយតម្លៃចំពោះការវិនិយោគដែលមានសក្តានុពលនៅក្នុងទីផ្សារអាហ្វ្រិក ដើម្បីគាំទ្រដល់កំណើន និងស្វែងរកឱកាសថ្មីៗ ចំពេលដែលកំពុងមានការធ្លាក់ចុះនៃសេដ្ឋកិច្ចរបស់ប្រទេសចិន។
លោកបាននិយាយបន្តថា វិបត្តិសេដ្ឋកិច្ចរបស់ប្រទេសចិនពិតជាប៉ះពាល់ដល់តំបន់អាស៊ីអាគ្នេយ៍ដែលមានទំនាក់ទំនងពាណិជ្ជកម្មខ្លាំងជាមួយនឹងប្រទេសសេដ្ឋកិច្ចធំលំដាប់ទីពីររបស់ពិភពលោកមួយនេះ។
លោក រ៉ាស់ជីដ បានប្រាប់សារព័ត៌មាន Nikkei Assia ថា «អ្វីដែលសំខាន់ត្រូវមើល គឺថាឥឡូវនេះយើងកំពុងសម្លឹងមើលទីផ្សារមិនប្រពៃណីផ្សេងៗទៀត ដោយយើងកំពុងនិយាយអំពីទ្វីបអាហ្វ្រិក»។
ជាមួយនឹងចំនួនប្រជាជនជាង ១ប៊ីលាននាក់ ទ្វីបអាហ្រ្វិកត្រូវបានមើលឃើញថាពោរពេញទៅដោយទីផ្សារអនាគតដ៏មានសក្តានុពលសម្រាប់បណ្តាក្រុមហ៊ុនមកពីជុំវិញពិភពលោក។
កាលពីចុងខែសីហា ប្រធានាធិបតីឥណ្ឌូណេស៊ី លោក ចូកូ វីដូដូ បានធ្វើដំណើរទៅទ្វីបអាហ្វ្រិកជាលើកដំបូងក្នុងនាមជាមេដឹកនាំនៃប្រទេសសេដ្ឋកិច្ចធំបំផុតនៅអាស៊ីអាគ្នេយ៍។ ដំណើរទស្សនកិច្ចរបស់លោកទៅកាន់ប្រទេសកេនយ៉ា តង់ហ្សានី ម៉ូសំប៊ិក និងអាហ្រ្វិកខាងត្បូង ជាការកត់សម្គាល់មួយនៅក្នុងទំនាក់ទំនងការទូតសេដ្ឋកិច្ចរបស់ប្រទេសឥណ្ឌូណេស៊ី ខណៈដែលខ្លួនកំពុងស្វែងរកទីផ្សារនាំចេញថ្មីសម្រាប់ផលិតផលឱសថ និងទំនិញ ដូចជាប្រេងដូងជាដើម។
លោក រ៉ាស់ជីដ ដែលជាប្រធានសភាពាណិជ្ជកម្ម និងឧស្សាហកម្មឥណ្ឌូណេស៊ី និងជាប្រធានក្រុមហ៊ុនថាមពលឥណ្ឌីការបស់ឥណ្ឌូណេស៊ីផងដែរនោះ បាននិយាយថា បច្ចុប្បន្ននេះ បណ្តាប្រទេសនៅអាស៊ានកំពុងវាយតម្លៃពីកន្លែងដែលមានតម្រូវការស្រាប់ ហើយប្លុកគួរតែវិនិយោគទៅលើហេដ្ឋារចនាសម្ព័ន្ធនៅអាហ្វ្រិក ដើម្បីលើកកម្ពស់ពាណិជ្ជកម្មប្រកបដោយប្រសិទ្ធភាពរវាងតំបន់ទាំងពីរ៕
ប្រភព៖ ទីភ្នាក់ងារសារព័ត៌មានកម្ពុជា
