បរទេស៖ អាជ្ញាធរសេដ្ឋកិច្ច និងអភិវឌ្ឍជាតិ (NEDA) របស់ប្រទេសហ្វីលីពីនបាននិយាយថា ប្រទេសហ្វីលីពីនកំពុងពិចារណាជម្រើសផ្សេងៗដើម្បីដោះស្រាយបញ្ហាតម្លៃអង្ករខ្ពស់ ។
កាលពីពេលថ្មីៗនេះ លេខាធិការអាជ្ញាធរ NEDA លោក អាសេនីអូ បាលីសាកាន និងរដ្ឋមន្រ្តីក្រសួងហិរញ្ញវត្ថុ លោក បេនចាមីន អ៊ី ឌីអុកណូ បានស្នើឱ្យកាត់បន្ថយអត្រាពន្ធ ៣៥% ជាបណ្តោះអាសន្នទៅលើអង្ករពីបណ្តាប្រទេសនៅអាស៊ាន។
លោក បាលីសាកាន បានសង្កត់ធ្ងន់ទៅលើតម្រូវការក្នុងការកាត់បន្ថយពន្ធជាបណ្ដោះអាសន្ន ចំពេលដែលមានការកើនឡើងតម្លៃជាសកល ដើម្បីការពារផលប៉ះពាល់អវិជ្ជមានទៅលើតម្លៃលក់រាយ លក់ដុំ និងតម្លៃកសិដ្ឋាន។
លោកបានកត់សម្គាល់ថា អាជ្ញាធរ NEDA នឹងពិភាក្សាជាមួយលោកប្រធានាធិបតី ហ្វឺឌីនែនដ៍ ម៉ាកូស អំពីជម្រើសផ្សេងៗទៀតដើម្បីកាត់បន្ថយតម្លៃអង្ករជំនួសឱ្យការដាក់កម្រិតតម្លៃ។ កម្រិតតម្លៃដែលបញ្ជាដោយប្រធានាធិបតី គឺគ្រាន់តែបណ្ដោះអាសន្នប៉ុណ្ណោះ ខណៈដែលរដ្ឋាភិបាលត្រូវស្វែងរកជម្រើសល្អជាងនេះ។
អាជ្ញាធរ NEDA កំពុងតាមដានយ៉ាងដិតដល់ទៅលើតម្លៃអង្ករពិភពលោក និងបរិមាណនាំចេញរបស់ប្រទេសនាំចេញធំៗ។ ការហាមឃាត់ការនាំចេញអង្កររបស់ប្រទេសឥណ្ឌាកាលពីពេលថ្មីៗនេះ និងសម្ពាធពីប្រទេសនាំចេញសំខាន់ៗដូចជាវៀតណាម និងថៃ បានជំរុញឱ្យកើនឡើងតម្លៃអង្កររបស់ពិភពលោក។ បាតុភូតអ៊ែលនីណូក៏អាចរួមចំណែកដល់ការឡើងថ្លៃនេះដែរ៕
ប្រភព៖ ទីភ្នាក់ងារសារព័ត៌មានកម្ពុជា
