បរទេស៖ លោកស្រី ភួងផេត ជុនឡៃអាដ រដ្ឋមន្ត្រីក្រសួងការបរទេសថៃបាននិយាយថា ប្រទេសថៃនឹងសហការជាមួយប្រទេសវៀតណាមដើម្បីប្រយុទ្ធប្រឆាំងនឹងព័ត៌មានក្លែងក្លាយ។
ព័ត៌មាននេះត្រូវបានលាតត្រដាងដោយលោកស្រី ភួងផេង បន្ទាប់ពីលោកស្រីបានជួបជាមួយរដ្ឋមន្ត្រីក្រសួងព័ត៌មាន និងទំនាក់ទំនងវៀតណាម លោក ង្វៀន ម៉ាញហ៊ុង ដើម្បីទទួលបានការយល់ដឹងអំពីគំនិតផ្តួចផ្តើមប្រឆាំងនឹងព័ត៌មានក្លែងក្លាយ។ កិច្ចប្រជុំនោះបានធ្វើឡើងនៅខាងក្រៅសន្និសីទលើកទី១៨ នៃរដ្ឋមន្ត្រីអាស៊ានទទួលបន្ទុកព័ត៌មាន (AMRI) និងសន្និសីទ AMRI បូក៣ លើកទី៧ នៅទីក្រុងដាណាងរបស់ប្រទេសវៀតណាម ដែលបានធ្វើឡើងចាប់ពីថ្ងៃទី២២-២៣ ខែកញ្ញាកន្លងទៅ។
លោកស្រីបានកោតសរសើរដល់ប្រទេសវៀតណាមដែលបានបង្កើតគណៈកម្មាធិការមួយដើម្បីប្រឆាំងនឹងព័ត៌មានក្លែងក្លាយនៅលើបណ្តាញសង្គម។ យោងតាមលោកស្រី ភួងផេត បានឱ្យដឹងថា ការប្រយុទ្ធប្រឆាំងនឹងព័ត៌មានក្លែងក្លាយ គឺជាចំណុចសំខាន់មួយមុនពេលកិច្ចប្រជុំ AMRI ដោយលោកស្រីបាននិយាយបន្ថែមថា ប្រទេសថៃក៏គាំទ្រដល់គោលការណ៍ណែនាំស្តីពីការគ្រប់គ្រងព័ត៌មានរបស់រដ្ឋាភិបាលក្នុងការប្រយុទ្ធប្រឆាំងនឹងព័ត៌មានក្លែងក្លាយ និងព័ត៌មានមិនពិតនៅក្នុងប្រព័ន្ធផ្សព្វផ្សាយ ដូចដែលបានអនុម័តនៅក្នុងកិច្ចប្រជុំ AMRI លើកទី១៦ ផងដែរ។
រដ្ឋមន្ត្រីទាំងពីរបានឯកភាពគ្នាថា ក្រមសីលធម៌អ្នកសារព័ត៌មានគឺជាគន្លឹះសំខាន់ដើម្បីធានាបាននូវភាពជឿជាក់នៃព័ត៌មាន។ លោកស្រីក៏បានជំរុញឱ្យមានការចែករំលែកព័ត៌មានបន្ថែមទៀតរវាងប្រទេសទាំងពីរ ក៏ដូចជាក្នុងចំណោមប្រទេសជាសមាជិកអាស៊ាន៕
ប្រភព៖ ទីភ្នាក់ងារសារព័ត៌មានកម្ពុជា
