បរទេស៖ គណៈប្រតិភូមកពីគណៈកម្មាធិការកិច្ចការជនជាតិនៃរដ្ឋសភាឡាវដែលដឹកនាំដោយប្រធានសភាឡាវ លោក ខាំចាញ សូតាប៉ាសឺធ បានជួបពិភាក្សាការងារជាមួយថ្នាក់ដឹកនាំនៃទីក្រុងដាណាងរបស់ប្រទេសវៀតណាម ដែលជាផ្នែកមួយនៃដំណើរបំពេញទស្សនកិច្ចការងារនៅវៀតណាម។
នៅក្នុងពិធីនោះ លោក លួង ង្វៀន មីញ ទ្រាត អនុលេខាធិការអចិន្ត្រៃយ៍នៃគណៈកម្មាធិការបក្សប្រចាំទីក្រុង និងជាប្រធានក្រុមប្រឹក្សាប្រជាជនទីក្រុង បានជម្រាបជូនដល់ភាគីឡាវអំពីការអភិវឌ្ឍសង្គមសេដ្ឋកិច្ចរបស់ទីក្រុង ក្រោយការរីករាលដាលនៃជំងឺរាតត្បាតកូវីដ-១៩។
បច្ចុប្បន្ននេះ វិស័យទេសចរណ៍ គឺជាចំណុចខ្លាំងមួយនៃការអភិវឌ្ឍរបស់ទីក្រុងដាណាង។ លោកបាននិយាយថា ចាប់តាំងពីដើមឆ្នាំនេះមក ទីក្រុងនេះបានស្វាគមន៍ភ្ញៀវទេសចរប្រមាណជិត ៥,៤លាននាក់ ដោយក្នុងនោះមានភ្ញៀវទេសចរបរទេសចំនួន ១,៥លាននាក់។
មន្ត្រីរូបនោះបានកត់សម្គាល់ថា ទីក្រុងដាណាងកំពុងផ្តល់អាទិភាពដល់ការអភិវឌ្ឍវិស័យមួយចំនួនរបស់ខ្លួនដែលមានភាពខ្លាំង ដូចជាកំពង់ផែសមុទ្រ ភស្តុភារ បច្ចេកវិទ្យាព័ត៌មាន ទំនាក់ទំនង អេឡិចត្រូនិក និងទូរគមនាគមន៍ ហើយផ្តោតសំខាន់ទៅលើការអភិវឌ្ឍសេដ្ឋកិច្ចឌីជីថល។
លោក ទ្រាត បាននិយាយថា ទីក្រុងនេះមានទំនាក់ទំនងនៃកិច្ចសហប្រតិបត្តិការជាមួយខេត្តចំនួន៧ នៅក្នុងប្រទេសឡាវ ដោយលោកបានលើកឡើងថា ភាគីទាំងពីរបានរីករាយនឹងកិច្ចសហប្រតិបត្តិការលើគ្រប់វិស័យ និងរក្សាបានទៀងទាត់នូវការផ្លាស់ប្តូរគណៈប្រតិភូដើម្បីជួយសម្រេចនូវកិច្ចសហប្រតិបត្តិការទាំងនោះ។
លោកបាននិយាយបន្តថា ទីក្រុងដាណាងតែងតែយកចិត្តទុកដាក់ និងវាយតម្លៃខ្ពស់ចំពោះកិច្ចសហប្រតិបត្តិការជាមួយបណ្តាខេត្តនានាក្នុងប្រទេសឡាវ។
ដោយឡែក លោក សូតាប៉ាសឺធ បានកោតសរសើរចំពោះការស្តារឡើងវិញ និងការអភិវឌ្ឍរបស់ទីក្រុងដាណាងក្រោយការរាតត្បាតនៃជំងឺកូវីដ-១៩។ លោកក៏បានឆ្លៀតឱកាសថ្លែងអំណរគុណដល់រដ្ឋបាលក្រុងដែលបានជួយសម្រួលដល់កិច្ចសហប្រតិបត្តិការជាមួយខេត្តនានារបស់ប្រទេសឡាវ។
លោកបាននិយាយបន្តថា ដំណើរទស្សនកិច្ចនោះនឹងជួយតភ្ជាប់ទំនាក់ទំនង និងលើកកម្ពស់វិស័យទេសចរណ៍ និងការអភិវឌ្ឍសង្គមសេដ្ឋកិច្ចរវាងភាគីទាំងពីរ៕
ប្រភព៖ ទីភ្នាក់ងារសារព័ត៌មានកម្ពុជា
