បរទេស៖ កាលពីថ្ងៃអាទិត្យ ទីភ្នាក់ងារសារព័ត៌មាន Tasnim របស់អ៊ីរ៉ង់បានរាយការណ៍ដោយដកស្រង់ពីក្រសួងចារកម្មថា ក្រុមអាជ្ញាធរក្នុងប្រទេសអ៊ីរ៉ង់បានដោះគ្រាប់បែកចំនួន ៣០គ្រាប់ ដែលការបង្កប់នោះមានបំណងចង់បំផ្ទុះនាពេលដំណាលគ្នាក្នុងរដ្ឋធានី Tehran និងបានឃុំខ្លួនភេរវករ ២៨នាក់ ដែលមានទំនាក់ទំនងជាមួយក្រុមរដ្ឋអ៊ីស្លាម។
នៅក្នុងសេចក្តីថ្លែងការណ៍មួយ ក្រសួងចារកម្មរបស់អ៊ីរ៉ង់បានបន្ថែមថា “សមាជិកមួយចំនួនគឺជាក្រុមរដ្ឋអ៊ីស្លាម (IS) និងឧក្រិដ្ឋជនមានប្រវត្តិពាក់ព័ន្ធជាមួយក្រុម Takfiri នៅក្នុងប្រទេសស៊ីរី អាហ្វហ្គានីស្ថាន ប៉ាគីស្ថាន និងតំបន់ Kurdistan នៃប្រទេសអ៊ីរ៉ាក់”។
ក្រុមសកម្មប្រយុទ្ធបានអះអាងទទួលខុសត្រូវចំពោះការវាយប្រហារជាច្រើនលើកក្នុងប្រទេសអ៊ីរ៉ង់ រួមទាំងការបំផ្ទុះគ្រាប់បែកពីរដងយ៉ាងសាហាវកាលពីឆ្នាំ២០១៧ ដែលបានសំដៅទៅលើសភារបស់ប្រទេសអ៊ីរ៉ង់ និងផ្នូររបស់ស្ថាបនិកសាធារណរដ្ឋអ៊ីស្លាមលោក Ayatollah Ruhollah Khomeini ។
ថ្មីៗនេះ ក្រុម IS បានអះអាងទទួលខុសត្រូវចំពោះការវាយប្រហារលើទីសក្ការសាសនា Shia កាលពីខែតុលា ដែលបង្កឲ្យមនុស្ស ១៥នាក់ត្រូវបានស្លាប់នៅភាគនិរតីនៃទីក្រុង Shiraz៕
ប្រភព៖ អគ្គស្នងការដ្ឋាននគរបាលជាតិ
