បរទេស៖ អ្នកការទូតកំពូលរបស់រុស្ស៊ី លោក ស៊ែរហ្គេយ ឡាវរ៉ូវ បាននិយាយកាលពីថ្ងៃសៅរ៍សប្តាហ៍មុនថា លោកនឹងទៅបំពេញទស្សនកិច្ចនៅប្រទេសកូរ៉េខាងជើងនៅខែក្រោយ ដែលជាផ្នែកមួយនៃវិធានការតាមដានចំពោះកិច្ចប្រជុំកំពូលដ៏កម្ររវាងមេដឹកនាំរបស់ពួកគេកាលពីដើមខែនេះ។
រដ្ឋមន្ត្រីការបរទេសរុស្ស៊ី លោក ស៊ែរហ្គេយ ឡាវរ៉ូវ បានធ្វើការកត់សម្គាល់ខាងលើនេះនៅក្នុងសន្និសីទសារព័ត៌មានមួយនៅទីស្នាក់ការអង្គការសហប្រជាជាតិនៅទីក្រុងញូវយ៉ក។ លោកបាននិយាយថា ដំណើរទស្សនកិច្ចនាពេលខាងមុខនេះ ធ្វើឡើងតាមកិច្ចព្រមព្រៀងរវាងមេដឹកនាំកូរ៉េខាងជើង លោក គីម ជុងអ៊ុន និងប្រធានាធិបតីរុស្ស៊ី លោក វ្ល៉ាឌីមៀ ពូទីន។
លោក គីម និងលោក ពូទីន បានមានជំនួបកំពូលនៅរុស្ស៊ីកាលពីថ្ងៃទី ១៣ ខែកញ្ញា ដោយការបង្កើនការរំពឹងទុកថា ប្រទេសកូរ៉េខាងជើងអាចនឹងឈានដល់កិច្ចព្រមព្រៀងមួយក្នុងការផ្គត់ផ្គង់គ្រាប់រំសេវសម្រាប់សង្គ្រាមរុស្ស៊ីនៅអ៊ុយក្រែន ជាថ្នូរនឹងជំនួយស្បៀងអាហារ និងការផ្ទេរបច្ចេកវិទ្យាសព្វាវុធ។
ក្រុមអ្នកសង្កេតការណ៍បាននិយាយថា ដំណើរទស្សនកិច្ចរបស់លោក ពូទីន ទៅកាន់ប្រទេសកូរ៉េខាងជើង អាចត្រូវបានពិភាក្សាក្នុងអំឡុងពេលនៃដំណើរទស្សនកិច្ចរបស់លោក ឡាវរ៉ូវ ខណៈដែលមេដឹកនាំរុស្ស៊ីមុននេះបានទទួលយកការអញ្ជើញរបស់លោក គីម នៅឯកិច្ចប្រជុំកំពូលនោះ៕
ប្រភព៖ ទីភ្នាក់ងារសារព័ត៌មានកម្ពុជា
