បរទេស៖ សមាគមឧស្សាហកម្មពោតមីយ៉ាន់ម៉ា (MCIA) បានបញ្ជាក់ប្រាប់សារពត៌មានស៊ីនហួថា សមាគម MCIA កំពុងស្វែងរកមធ្យោបាយដើម្បីជំរុញការនាំចេញពោតទៅកាន់ប្រទេសចិននៅក្នុងឆ្នាំ២០២៣ នេះ។
ប្រភពពីសមាគម MCIA បានប្រាប់សារពត៌មានស៊ីនហួថា «យើងរំពឹងថា នឹងនាំចេញពោតចំនួន ៤០០.០០០តោនទៅកាន់ប្រទេសចិននៅក្នុងឆ្នាំនេះ។ ពោតត្រូវបាននាំចេញទៅកាន់ប្រទេសចិន វៀតណាម និងហ្វីលីពីន ចាប់ពីខែកញ្ញាដល់ខែមករា»។
បើទោះបីប្រទេសថៃជាប្រទេសនាំចូលពោតលេខ១ របស់មីយ៉ាន់ម៉ាក៏ដោយ ក៏សមាគមនោះបានស្វែងរកចំណែកដ៏ធំនៃទីផ្សារចិននៅក្នុងឆ្នាំនេះដែរ ដើម្បីជំរុញការនាំចេញពោតរបស់ប្រទេសទាំងមូល។ នេះបើតាមយោងតាមសមាគម MCIA។
ពោតជាទំនិញនាំចេញដ៏សំខាន់មួយរបស់ប្រទេសក្នុងតំបន់អាស៊ីអាគ្នេយ៍មួយនេះ បន្ទាប់ពីសណ្តែក និងគ្រាប់ធញ្ញជាតិផ្សេងៗទៀត។
ប្រទេសមីយ៉ាន់ម៉ាត្រូវបានប៉ាន់ប្រមាណថា នឹងនាំចេញពោតចំនួន ២លានតោននៅក្នុងឆ្នាំនេះ ហើយក្នុងនោះ ១លានតោនត្រូវបាននាំចេញទៅកាន់ប្រទេសថៃក្នុងអំឡុងខែកុម្ភៈដល់ខែសីហា៕
ប្រភព៖ ទីភ្នាក់ងារសារព័ត៌មានកម្ពុជា
