បរទេស៖ កាលពីថ្ងៃពុធ អង្គការសប្បុរសធម៌ 88 Project បាននិយាយថា ប្រទេសវៀតណាមបានឃុំខ្លួនអ្នកជំនាញថាមពលម្នាក់ ក្នុងរយៈពេលប៉ុន្មានថ្ងៃបន្ទាប់ពីដំណើរទស្សនកិច្ច របស់ប្រធានាធិបតីសហរដ្ឋអាមេរិកលោក Joe Biden និងប្រកាសពីគំនិតផ្តួចផ្តើមរួមគ្នាជាច្រើន រួមទាំងការការពារសិទ្ធិមនុស្ស។
នៅក្នុងសេចក្តីថ្លែងការណ៍មួយអង្គការសប្បុរសធម៌បាននិយាយថា កាលពីថ្ងៃទី១៥ ខែកញ្ញា នគរបាលទីក្រុងហាណូយបានចាប់ខ្លួនលោកស្រី Ngo Thi To Nhien នាយកប្រតិបត្តិនៃគំនិតផ្តួចផ្តើមវៀតណាម សម្រាប់ការបម្លែងថាមពល (VIET) ដែលជាក្រុមអ្នកជំនាញឯករាជ្យផ្តោតលើគោលនយោបាយ ថាមពលបៃតង។
ប៉ុន្តែក្រុមអាជ្ញាធរមិនបានធ្វើការប្រកាសអំពីការឃុំខ្លួននេះទេ ហើយក៏មិនមានប្រព័ន្ធផ្សព្វផ្សាយក្នុងស្រុករាយការណ៍ពីរឿងនេះដែរ។ រដ្ឋាភិបាលក៏មិនបានឆ្លើយតបភ្លាមៗ ចំពោះសំណើរបស់សារព័ត៌មានរ៉យទ័រសម្រាប់ការអត្ថាធិប្បាយទេ។ មនុស្សម្នាក់ដែលដឹងពីបញ្ហានេះបានបញ្ជាក់ប្រាប់សារព័ត៌មានរ៉យទ័រថា លោកស្រី Nhien ត្រូវបានឃុំខ្លួន។
អង្គការសប្បុរសធម៌ 88 Project បាននិយាយទៀតថា បច្ចុប្បន្ននេះ អ្នកជំនាញផ្នែកថាមពល និងអាកាសធាតុចំនួនប្រាំនាក់ផ្សេងទៀតកំពុងត្រូវបានឃុំខ្លួននៅក្នុងប្រទេសវៀតណាម ខណៈដែល ប្រទេសដែលគ្រប់គ្រងដោយកុម្មុយនិស្តកំពុងចរចាជាមួយដៃគូអន្តរជាតិក្នុងការពន្លឿនគោលនយោបាយ ដើម្បីដោះស្រាយបញ្ហាការប្រែប្រួលអាកាសធាតុ៕
ប្រភព៖ អគ្គស្នងការដ្ឋាននគរបាលជាតិ
