បរទេស៖ បើយោងតាមសេចក្តីថ្លែងការណ៍ដែលបានចែករំលែកនៅលើវេទិការប្រព័ន្ធ ផ្សព្វផ្សាយទំនាក់ទំនង X ដោយលោក Ariel Henry នាយករដ្ឋមន្ត្រីហៃទីដែលជាប្រទេសក្នុងតំបន់ Caribbean បានឲ្យដឹងថា កាលពីថ្ងៃពុធ ប្រទេសហៃទី និងកេនយ៉ា បានបង្កើតទំនាក់ទំនងផ្នែកការទូត។
ការបង្កើតទំនាក់ទំនងផ្នែកការទូតនេះកើតឡើង ចំពេលមានការពិភាក្សាជាអន្តរជាតិជុំវិញលទ្ធភាពរបស់ ប្រទេសកេនយ៉ាក្នុងការដឹកនាំកម្លាំងសន្តិសុខចម្រុះជាតិសាសន៍ ដែលគាំទ្រដោយអង្គការសហប្រជាជាតិ ដើម្បីជួយនគរបាលប្រយុទ្ធប្រឆាំងនឹងការកើនឡើងនៃសង្គ្រាមក្រុមអន្ធពាលនៅក្នុងប្រទេសហៃទី។
កាលពីដើមសប្តាហ៍នេះ នៅក្នុងបទសម្ភាសន៍ជាមួយវិទ្យុ Voice of America ជំនួយការរដ្ឋមន្ត្រីការបរទេសសហរដ្ឋអាមេរិកទទួលបន្ទុកកិច្ចការអឌ្ឍគោលខាងលិច លោក Brian Nichols បាននិយាយថា ក្រុមប្រឹក្សាសន្តិសុខអង្គការសហប្រជាជាតិអាចបោះឆ្នោតជ្រើសរើសកងកម្លាំង ចម្រុះជាតិសាសន៍សម្រាប់ប្រទេសហៃទីក្នុងរយៈពេលប្រហែលមួយសប្តាហ៍ ។
កាលពីខែតុលាឆ្នាំមុន រដ្ឋាភិបាលរបស់លោក Henry បានស្នើសុំជំនួយអន្តរជាតិជាលើកដំបូង ប៉ុន្តែទោះបីជាមានការអំពាវនាវម្តងហើយម្តងទៀតពីអង្គការសហប្រជាជាតិក៏ដោយ សំណើនេះមិនបានឆ្លើយតបរហូតដល់ប្រទេសកេនយ៉ាបាននិយាយថា ខ្លួនបានរៀបចំដើម្បីដឹកនាំក្រុមកងកម្លាំងជួយកាលពីខែកក្កដា។
នគរបាលរបស់ប្រទេសហៃទីដែលខ្វះធនធានបាននឹងកំពុងប្រយុទ្ធជាមួយនឹងក្រុមអន្ធពាលដ៏មានឥទ្ធិពល ដែលឥឡូវនេះ ត្រូវបានគេប៉ាន់ស្មានថា នឹងគ្រប់គ្រងផ្នែកមួយចំនួនធំនៃប្រទេស៕
ប្រភព៖ អគ្គស្នងការដ្ឋាននគរបាលជាតិ
