បរទេស៖ នៅថ្ងៃព្រហស្បតិ៍នេះ ប្រព័ន្ធផ្សព្វផ្សាយរដ្ឋបានរាយការណ៍ថា មេដឹកនាំកូរ៉េខាងជើងលោកគីម ជុងអ៊ុន បានអញ្ជើញប្រធានាធិបតីរុស្ស៊ីលោក ពូទីន ទៅកាន់ប្រទេសកូរ៉េខាងជើង ក្នុងអំឡុងកិច្ចពិភាក្សារបស់មេដឹកនាំទាំងពីរក្នុងប្រទេសរុស្ស៊ី ដោយលោកគីម រំពឹងថានឹងបន្តដំណើរទស្សនកិច្ចទៅកាន់កន្លែងផលិតសព្វាវុធយោធា។
ទីភ្នាក់ងារសារព័ត៌មានរដ្ឋ KCNA បាននិយាយថា លោកពូទីនបានទទួលយកការអញ្ជើញនេះ ប៉ុន្តែមិនទាន់បញ្ជាក់ពីកាលបរិច្ឆេទនោះទេ។
KCNA បាននិយាយថា លោកគីម បានប្រាប់លោកពូទីនថា កិច្ចប្រជុំនៅតំបន់ Far East របស់រុស្ស៊ីបាននាំមកនូវទំនាក់ទំនងទ្វេភាគីកម្រិតថ្មីមួយ និងបានបង្ហាញពីឆន្ទៈក្នុងការជំរុញទំនាក់ទំនងឲ្យមានស្ថិរភាព និងទិសដៅសម្រាប់ ១០០ឆ្នាំនាពេលអនាគត។
KCNA បានបន្ថែមថា ការអញ្ជើញលោកពូទីន របស់លោកគីម ទៅបំពេញទស្សនកិច្ចនៅកូរ៉េខាងជើង បានធ្វើឡើងនៅចុងបញ្ចប់នៃពិធីទទួលស្វាគមន៍ដែលរៀបចំដោយប្រធានាធិបតីរុស្ស៊ី បន្ទាប់ពីមេដឹកនាំទាំងពីរបានទស្សនាមជ្ឈមណ្ឌលអវកាស Vostochny Cosmodrome និងបានពិភាក្សាគ្នាអំពីទំនាក់ទំនងទ្វេភាគី និងការជំរុញកិច្ចសហប្រតិបត្តិការ។
KCNA បានបន្តទៀតថា “នៅចុងបញ្ចប់នៃពិធីទទួលស្វាគមន៍នោះ លោកគីម បានអញ្ជើញលោកពូទីន ទៅបំពេញទស្សនកិច្ចនៅសាធារណរដ្ឋប្រជាធិបតេយ្យប្រជាមានិតកូរ៉េ ក្នុងពេលសមស្រប” ដោយសំដៅទៅលើឈ្មោះផ្លូវការរបស់កូរ៉េខាងជើង៕
ប្រភព៖ អគ្គស្នងការដ្ឋាននគរបាលជាតិ
