បរទេស៖ ប្រធានាធិបតីចិន លោក ស៊ី ជីនពីង បានជួបជាមួយប្រធានគណៈកម្មាធិការអន្តរជាតិនៃកាកបាទក្រហម (ICRC) លោកស្រី មៀចាណា ស្ពូលចារីក អ៊ែហ្គហ្គ័រ នៅទីក្រុងប៉េកាំងកាលពីថ្ងៃអង្គារ។
លោក ស៊ី បាននិយាយអំពីការងារមនុស្សធម៌អន្តរជាតិដែលធ្វើឡើងដោយគណៈកម្មាធិការ ICRC ក្នុងរយៈពេល ១៦០ឆ្នាំកន្លងមកនេះ ចាប់តាំងពីការបង្កើតមក និងបានសាទរចំពោះការរួមចំណែកដ៏សំខាន់របស់ខ្លួនចំពោះសន្តិភាព និងវឌ្ឍនភាពពិភពលោក។
លោក ស៊ី បាននិយាយថា «ការពិតបានបង្ហាញឱ្យឃើញថា ប្រទេសចិន គឺជាអ្នកគាំទ្រ និងចូលរួមយ៉ាងសកម្ម និងជាអ្នករួមចំណែកដល់បុព្វហេតុមនុស្សធម៌អន្តរជាតិ។ ប្រទេសចិនបានត្រៀមខ្លួនរួចជាស្រេចដើម្បីធ្វើការងារកាន់តែជិតស្និទ្ធជាមួយគណៈកម្មាធិការ ICRC និងធ្វើការងាររួមចំណែកយ៉ាងសំខាន់ចំពោះសន្តិភាព និងវឌ្ឍនភាពរបស់មនុស្សជាតិ។
លោកស្រី ស្ពូលចារីក បានអបអរសាទរដល់ប្រទេសចិនដែលបានក្លាយជាប្រទេសដែលមានចំនួនអ្នកទទួលបានពានរង្វាន់ Florence Nightingale លើកទី៤៩ ច្រើនជាងគេ ដែលជាការបង្ហាញថា គណៈកម្មាធិការ ICRC និងសហគមន៍អន្តរជាតិទទួលស្គាល់យ៉ាងខ្លាំងនូវសមិទ្ធិផលមនុស្សធម៌របស់ប្រទេសចិន។
លោកស្រី ស្ពូលចារីក បាននិយាយថា ប្រទេសចិនតែងតែគោរព និងអនុវត្តច្បាប់មនុស្សធម៌អន្តរជាតិ ហើយគំនិតផ្តួចផ្តើមខ្សែក្រវ៉ាត់ និងផ្លូវបានជំរុញការអភិវឌ្ឍពិភពលោក និងជំរុញបុព្វហេតុមនុស្សធម៌ជាសកល។ លោកស្រីបាននិយាយបន្ថែមថា គណៈកម្មាធិការ ICRC វាយតម្លៃខ្ពស់ចំពោះតួនាទីវិជ្ជមានរបស់ប្រទេសចិន និងការរួមចំណែកដ៏សំខាន់ចំពោះបុព្វហេតុមនុស្សធម៌អន្តរជាតិ ហើយនឹងធ្វើឱ្យកិច្ចសហប្រតិបត្តិការកាន់តែស៊ីជម្រៅជាមួយប្រទេសចិន៕
ប្រភព៖ ក្រសួងព័ត៌មាន
