បរទេស៖ ថ្លែងមតិក្នុងពិធីបើកកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធនៅទីក្រុងហ្សាការតាកាលពីថ្ងៃទី៥ ខែកញ្ញា ប្រធានាធិបតីឥណ្ឌូណេស៊ី លោក ចូកូ វីដូដូ បានអំពាវនាវឱ្យអាស៊ាន និងប្រទេសដៃគូជំរុញកិច្ចសហប្រតិបត្តិការស្មើភាព និងផលប្រយោជន៍ទៅវិញទៅមក ដើម្បីប្រែក្លាយតំបន់នេះទៅជាចំណុចស្នូលនៃកំណើនសេដ្ឋកិច្ចពិភពលោក។
លោកប្រធានាធិបតីបានសង្កត់ធ្ងន់ថា អាស៊ានតែងតែរក្សាបាននូវសាមគ្គីភាព ចំពេលដែលមានភាពខុសគ្នា ការបន្ថែមមតិខុសគ្នាដែលជួយលើកកម្ពស់លទ្ធិប្រជាធិបតេយ្យ និងបង្ហាញថាប្លុកនេះគឺជាគ្រួសារដែលសមាជិកមានឋានៈស្មើគ្នា។
លោកបានគូសបញ្ជាក់ថា សមភាព គឺជា «គុណតម្លៃស្នូល» ដែលសមាគមរួមគ្នាគោរព និងលើកតម្កើងក្នុងក្របខណ្ឌនៃសាមគ្គីភាព និងភាពស្អិតរមួត ដើម្បីជំរុញ «នាវាដ៏អស្ចារ្យរបស់អាស៊ាន» មួយនេះឆ្ពោះទៅមុខ។
នៅក្នុងបរិបទនៃការកើនឡើងនៃបញ្ហាប្រឈម និងការប្រជែងគ្នាយ៉ាងខ្លាំងក្លារវាងមហាអំណាច មេដឹកនាំរូបនោះបានបញ្ជាក់ពីការប្តេជ្ញាចិត្តរបស់រដ្ឋជាសមាជិកប្រឆាំងនឹងការប៉ុនប៉ងណាមួយរបស់មហាអំណាចពិភពលោក ហើយអាស៊ានត្រៀមខ្លួនរួចជាស្រេចដើម្បីធ្វើកិច្ចសហប្រតិបត្តិការដើម្បីសន្តិភាព និងវិបុលភាព។
ដោយបាននិយាយថាពិភពលោកប្រៀបដូចជាមហាសមុទ្រដ៏ធំទូលាយសម្រាប់ធ្វើនាវាចរណ៍តែម្នាក់ឯង លោកប្រធានាធិបតីរូបនោះបានអំពាវនាវឱ្យ «នាវាផ្សេងទៀត» រួមកម្លាំងគ្នាដើម្បីធ្វើឱ្យអាស៊ានក្លាយជាទីកន្លែងសម្រាប់កិច្ចសហប្រតិបត្តិការ បង្កើតភាពរុងរឿង ស្ថិរភាព និងសន្តិភាពដោយមិនត្រឹមតែសម្រាប់តំបន់ប៉ុណ្ណោះទេ ប៉ុន្តែថែមទាំងសម្រាប់ពិភពលោកទាំងមូលផងដែរ៕
ប្រភព៖ ក្រសួងព័ត៌មាន
