អូស្ត្រាលី៖ កាលពីថ្ងៃអាទិត្យ ប្រទេសអូស្ត្រាលីបាននិយាយថា ខ្លួននឹងបញ្ជូននគរបាលបន្ថែមទៅកាន់ប្រទេស Solomon Islands ដើម្បីពង្រឹងសន្តិសុខសម្រាប់ការប្រកួតកីឡាប៉ាស៊ីហ្វិកនៅខែវិច្ឆិកាខាងមុខនេះ ហើយនឹងរក្សានគរបាលនៅទីនោះរហូតដល់ខែមិថុនា ដើម្បីជួយដល់ការបោះឆ្នោតសកល។
ការពង្រីកវត្តមាននគរបាលអូស្ត្រាលីកើតឡើងបន្ទាប់ពីប្រទេស Solomon Islands បង្កើនទំនាក់ទំនងជាមួយប្រទេសចិន ដោយបានចុះហត្ថលេខាលើកិច្ចព្រមព្រៀងស្តីពីកិច្ចការនគរបាលកាលពីខែកក្កដា។ ប្រទេសអូស្ត្រាលី នូវែលហ្សេឡង់ និងសហរដ្ឋអាមេរិកមានការព្រួយបារម្ភថា នគរបាលចិនអាចលុបចោលការរៀបចំសន្តិសុខដែលមានរយៈពេលដ៏យូរអង្វែង ដែលរដ្ឋធានី Canberra មានជាមួយប្រទេសដែលស្ថិតនៅប្រជុំកោះប៉ាស៊ីហ្វិកមួយនេះ។
កាលពីថ្ងៃសុក្រ ប្រទេស Solomon Islands បាននិយាយថា ខ្លួនបានអញ្ជើញអូស្ត្រាលីឲ្យបន្តវត្តមាននគរបាលនៅក្នុងប្រទេស ដែលការចូលរួមនោះត្រូវបានបញ្ចប់កាលពីខែធ្នូ។
កាលពីថ្ងៃអាទិត្យ នៅក្នុងសេចក្តីថ្លែងការណ៍មួយ អ្នកនាំពាក្យក្រសួងការបរទេស និងពាណិជ្ជកម្មអូស្ត្រាលីបាននិយាយថា ប្រទេសអូស្ត្រាលីគឺជា “ដៃគូសន្តិសុខចម្បង” របស់ប្រទេសដែលស្ថិតនៅប្រជុំកោះប៉ាស៊ីហ្វិកមួយនោះ។ ហើយនគរបាលអូស្ត្រាលីនឹងធ្វើការជាមួយនឹងមន្ត្រីមកពីប្រទេស Fiji, New Zealand និង Papua New Guinea ៕
ប្រភព៖ អគ្គស្នងការដ្ឋាននគរបាលជាតិ
