បរទេស៖ អាជ្ញាធរថៃបានបញ្ជាក់កាលពីថ្ងៃទី២៩ ខែសីហាម្សិលមិញថា ការវាយប្រហារដោយគ្រាប់បែកជាបន្តបន្ទាប់នៅក្នុងខេត្តប៉ាតានីរបស់ប្រទេសថៃ ដែលជាការវាយប្រហាររបស់ក្រុមបះបោរនៅភាគខាងត្បូងប្រទេសថៃ ដោយបានសម្លាប់មនុស្សចំនួន ២នាក់ និង ៤នាក់ផ្សេងទៀតរងរបួស។ ការបំផ្ទុះគ្រាប់បែកទាំងនោះបានវាយប្រហារស្រុកយ៉ារ៉ាងនៅខេត្តប៉ាតានីកាលពីយប់ថ្ងៃទី២៨ ខែសីហា ខណៈដែលកងកម្លាំងសន្តិសុខដើរល្បាតក្នុងតំបន់នោះ។
អភិបាលខេត្តប៉ាតានី លោក ប៉ាទីម៉ូហ៍ សាឌីយ៉ាមូ បាននិយាយថា ការស៊ើបអង្កេតទៅលើការវាយប្រហារនោះកំពុងដំណើរការ។
ប្រព័ន្ធផ្សព្វផ្សាយក្នុងស្រុកបានរាយការណ៍ថា ការបំផ្ទុះគ្រាប់បែកលើកដំបូងបានកំណត់គោលដៅលើរថយន្តប៉ូលិស បន្ទាប់មក ការបំផ្ទុះគ្រាប់បែកបានកើតឡើងជាបន្តបន្ទាប់នៅតាមបង្គោលអគ្គិសនីជាច្រើនកន្លែងទៀតនៅក្នុងតំបន់នោះ។
ប្រជាជនជាង ៧.០០០នាក់ត្រូវបានសម្លាប់ និង ១៣.៥០០នាក់ផ្សេងទៀតបានរងរបួសចាប់តាំងពីការបះបោរបានកើតឡើងនៅភាគខាងត្បូងនៃប្រទេសថៃតាំងពីឆ្នាំ២០០៤ មក។
អស់រយៈពេលជិតពីរទសវត្សរ៍មកហើយ ដែលខ្មាន់កាំភ្លើងបានធ្វើការវាយប្រហារជាប្រចាំដើម្បីទាមទារស្វ័យភាពក្នុងតំបន់នោះ ដែលភាគច្រើនជាអ្នកកាន់សាសនាអ៊ីស្លាម៕
ប្រភព៖ ទីភ្នាក់ងារសារព័ត៌មានកម្ពុជា
