បរទេស៖ ប្រទេសចិនកំពុងពិចារណាទៅលើផែនការនៃការកំណត់កាលបរិច្ឆេទថ្ងៃទី១៥ ខែសីហា ជាទិវាបរិស្ថានវិទ្យាជាតិរបស់ខ្លួន ដើម្បីបង្កើនការយល់ដឹងជាសាធារណៈ និងចាត់សកម្មភាពដើម្បីការពារបរិស្ថានអេកូឡូស៊ី។
សេចក្តីព្រាងនៃសេចក្តីសម្រេចស្តីពីការបង្កើតទិវានោះ ត្រូវបានដាក់ជូនគណៈកម្មាធិការអចិន្ត្រៃយ៍នៃសភាប្រជាជនជាតិលើកទី១៤ (NPC) ដែលជាស្ថាប័ននីតិប្បញ្ញត្តិកំពូលរបស់ប្រទេសចិន ដើម្បីពិនិត្យកាលពីថ្ងៃចន្ទ។
សេចក្តីព្រាងច្បាប់នេះបាននិយាយថា ប្រទេសចិនបានធ្វើការផ្លាស់ប្តូរជាប្រវត្តិសាស្ត្រ និងយ៉ាងទូលំទូលាយក្នុងកិច្ចការពារបរិស្ថានអេកូឡូស៊ីរបស់ខ្លួន និងធ្វើឱ្យមានសមិទ្ធិផលដែលពិភពលោកទទួលស្គាល់។ សេចក្តីព្រាងសេចក្តីសម្រេចនេះក៏ស្នើឱ្យបង្កើនការផ្សព្វផ្សាយជាសាធារណៈ និងការអប់រំអំពីអរិយធម៌អេកូឡូស៊ីតាមទម្រង់ផ្សេងៗផងដែរ។
គណៈកម្មាធិការអចិន្ត្រៃយ៍នៃ NPC លើកទី១៤ បានចាប់ផ្តើមសម័យប្រជុំលើកទី៣ របស់ខ្លួនកាលពីថ្ងៃច័ន្ទ ដើម្បីពិនិត្យទៅលើសេចក្តីព្រាងច្បាប់ និងការកែប្រែច្បាប់មួយចំនួន៕
ប្រភព៖ ទីភ្នាក់ងារសារព័ត៌មានកម្ពុជា
