បរទេស៖ រដ្ឋមន្ត្រីការបរទេសអូទ្រីស លោក អាឡិចសាន់ដឺរ ស្កាល់លែនបឺក (Alexander Schallenberg) បាននិយាយថា ទីក្រុងវីយែនរក្សាបណ្តាញទំនាក់ទំនងក្រៅផ្លូវការជាមួយទីក្រុងមូស្គូ ហើយបានអំពាវនាវឱ្យមានកិច្ចសន្ទនាជាមួយប្រទេសរុស្ស៊ី បើទោះបីជាមានជម្លោះអ៊ុយក្រែនក៏ដោយ។
លោកបានចង្អុលបង្ហាញនៅក្នុងបទសម្ភាសន៍មួយជាមួយកាសែត Die Welt របស់ប្រទេសអាល្លឺម៉ង់ដែលបានចុះផ្សាយកាលពីថ្ងៃចន្ទថា «លោកខាងលិចគួរតែបន្តកិច្ចពិភាក្សាជាមួយប្រទេសរុស្ស៊ីនូវរបៀបដែលរដ្ឋាភិបាលសហរដ្ឋអាមេរិកកំពុងធ្វើ»។
យោងតាមលោក ស្កាល់លែនបឺក បានឱ្យដឹងថា វេទិកាអន្តរជាតិមួយចំនួន ដូចជាអង្គការសន្តិសុខ និងសហប្រតិបត្តិការនៅអឺរ៉ុប (OSCE) និងអង្គការសហប្រជាជាតិ គួរតែត្រូវបានប្រើប្រាស់សម្រាប់កិច្ចពិភាក្សាបន្ថែមជាមួយប្រទេសរុស្ស៊ី។ អ្នកការទូតកំពូលរបស់អូទ្រីសមើលឃើញថា វាជាទំនួលខុសត្រូវជាសកលរបស់បណ្តាប្រទេសលោកខាងលិច។
លោក ស្កាល់លែនបឺក បានសង្កត់ធ្ងន់ថា ទីក្រុងវីយែនបានបន្តទំនាក់ទំនងជាមួយទីក្រុងមូស្គូតាមរយៈបណ្តាញក្រៅផ្លូវការ។ លោកបាននិយាយបន្ថែមថា «ប្រទេសរុស្ស៊ីមិនបានបាត់ខ្លួនពីផែនទីទេ ហើយនៅតែជាប្រទេសជិតខាងភូមិសាស្ត្រដ៏ធំបំផុតរបស់សហភាពអឺរ៉ុប និងជាមហាអំណាចនុយក្លេអ៊ែរដ៏សំខាន់របស់ពិភពលោក»៕
ប្រភព៖ ទីភ្នាក់ងារសារព័ត៌មានកម្ពុជា
