បរទេស៖ ប្រទេសថៃបានស្វាគមន៍ភ្ញៀវទេសចរបរទេសប្រមាណជិត ១០លាននាក់ហើយរហូតមកដល់ពេលនេះ ដោយទទួលបានប្រាក់ចំណូលប្រហែល ៣៩១ប៊ីលានបាត (ជាង ១១,៣ប៊ីលានដុល្លារអាម៉េរិក)។
លោកស្រី ត្រៃស៊ូលី តៃសារ៉ាណាគុល (Traisulee Taisaranakul) អ្នកនាំពាក្យរងរដ្ឋាភិបាលថៃត្រូវបានសារព័ត៌មានក្នុងស្រុកដកស្រង់សម្តីដែលបាននិយាយកាលពីថ្ងៃទី២០ ខែឧសភាថា ភ្ញៀវទេសចរបរទេសចំនួន ៩,៤៧លាននាក់បានទៅលេងប្រទេសថៃចាប់ពីខែមករា ដល់ថ្ងៃទី១៥ ខែឧសភា ដែលភាគច្រើនមកពីតំបន់អាស៊ីបូព៌ា អាស៊ីខាងត្បូង និងអាស៊ីអាគ្នេយ៍។
រដ្ឋាភិបាលថៃបានបញ្ជាឱ្យភ្នាក់ងារពាក់ព័ន្ធទាំងអស់បង្កើនការគាំទ្រដល់ភ្ញៀវទេសចរដែលចូលទៅប្រទេសថៃ ជាពិសេសភ្ញៀវចិនដើម្បីជំរុញកំណើនវិស័យទេសចរណ៍។ យោងតាមអាជ្ញាធរទេសចរណ៍ថៃ (TAT) បានឱ្យដឹងថា ប្រទេសថៃរំពឹងថានឹងមានភ្ញៀវទេសចរចិនជាង ៥,៣លាននាក់ទៅទស្សនាប្រទេសនេះ។ លោកស្រី ត្រៃស៊ូលី បាននិយាយបន្ថែមថា តួលេខនេះអាចឈានដល់ចំនួន ៧លាននាក់ ប្រសិនបើមានការគាំទ្រដោយការលើកទឹកចិត្តផ្នែកទេសចរណ៍ផ្សេងៗទៀត។
ប្រទេសថៃបានរំពឹងទុកថានឹងមានការកើនឡើងនៃចំនួនជើងហោះហើរពីប្រទេសចិនរហូតដល់ខែកញ្ញានៃឆ្នាំនេះ។ វាបានប៉ាន់ប្រមាណថា នឹងមានជើងហោះហើរ ៥.៣៣០ដងនៅក្នុងខែឧសភា ជើងហោះហើរចំនួន ៦.០៩០ដងនៅក្នុងខែមិថុនា ជើងហោះហើរចំនួន ៧.១៥០ដងនៅក្នុងខែកក្កដា ជើងហោះហើរចំនួន ៧.៤៦០ដងនៅក្នុងខែសីហា និងជើងហោះហើរចំនួន ៧.៣៤០ដងនៅក្នុងខែកញ្ញា។
លោកស្រី ត្រៃស៊ូលី បាននិយាយថា ចំនួនសរុបប៉ាន់ស្មាននៃជើងហោះហើររបស់ចិនដែលចូលទៅប្រទេសថៃក្នុងអំឡុងឆ្នាំសារពើពន្ធ២០២៣ ចាប់ពីខែតុលាឆ្នាំមុនដល់ខែកញ្ញាឆ្នាំនេះ គឺមានចំនួន ៤៦.១៧៥ដង។
ជាមួយគ្នានេះដែរ នាយកដ្ឋានសេដ្ឋកិច្ចទេសចរណ៍ និងកីឡានៃក្រសួងទេសចរណ៍ និងកីឡារបស់ប្រទេសថៃបានរាយការណ៍ថា មានភ្ញៀវទេសចរបរទេសចំនួន ៤១៥.៣០៩នាក់ទៅទស្សនាប្រទេសថៃក្នុងអំឡុងពេលពីថ្ងៃទី៨-១៤ ខែឧសភា ឬប្រមាណជិត ៥៩.៣២៩នាក់ក្នុងមួយថ្ងៃ ដែលភាគច្រើនមកពីតំបន់អាស៊ីអាគ្នេយ៍ អាស៊ីបូព៌ា និងអាស៊ីខាងត្បូង៕
ប្រភព៖ ទីភ្នាក់ងារសារព័ត៌មានកម្ពុជា
