បរទេស៖ អនុប្រធានាធិបតីចិន លោក ហាន ហ្សេង (Han Zheng) បានទៅបំពេញទស្សនកិច្ចនៅប្រទេសព័រទុយហ្គាល់កាលពីថ្ងៃអាទិត្យដល់ថ្ងៃអង្គារ ហើយបានជួបប្រជុំជាមួយប្រធានាធិបតីព័រទុយហ្គាល់ លោក ម៉ារសេឡូ រេបេឡួ ដឺ ស៊ូសា (Marcelo Rebelo de Sousa) និងនាយករដ្ឋមន្ត្រី លោក អាន់តូនីយ៉ូ កូស្តា (Antonio Costa) ដើម្បីពិភាក្សាអំពីទំនាក់ទំនងទ្វេភាគី។
នៅពេលជួបជាមួយ លោក រេបេឡួ ដឺ ស៊ូសា (Rebelo de Sousa) លោក ហាន បានពាំនាំនូវការសួរសុខទុក្ខដ៏ស្និទ្ធស្នាល និងការជូនពរដ៏ខ្ពង់ខ្ពស់របស់ប្រធានាធិបតីចិន លោក ស៊ី ជីនពីង (Xi Jinping)។
លោក ហាន បាននិយាយថា ក្រោមការដឹកនាំរបស់ប្រមុខរដ្ឋទាំងពីរ ទំនាក់ទំនងចិន-ព័រទុយហ្គាល់បានរក្សាបាននូវការអភិវឌ្ឍយ៉ាងរឹងមាំ និងមានស្ថិរភាព។
លោក ហាន បាននិយាយថា ចាប់តាំងពីដើមឆ្នាំនេះមក សេដ្ឋកិច្ច និងសង្គមរបស់ប្រទេសចិនបានវិលមករកភាពប្រក្រតីវិញ ហើយកំណើនសេដ្ឋកិច្ចរបស់ខ្លួនបានកើនឡើង ដោយបង្កើតឱកាសសម្រាប់កិច្ចសហប្រតិបត្តិការកាន់តែច្រើនរវាងប្រទេសចិន និងព័រទុយហ្គាល់ និងប្រទេសដទៃទៀត។
លោកបាននិយាយបន្ថែមថា ប្រទេសចិនបានប្តេជ្ញាចិត្តក្នុងការអភិវឌ្ឍទំនាក់ទំនងមិត្តភាព និងកិច្ចសហប្រតិបត្តិការជាមួយប្រទេសដទៃទៀត លើកកម្ពស់ការកសាងទំនាក់ទំនងអន្តរជាតិប្រភេទថ្មី និងការពង្រីកផលប្រយោជន៍រួមជាមួយនឹងប្រទេសដទៃទៀត។
ប្រធានាធិបតីព័រទុយហ្គាល់បាននិយាយថា ប្រទេសព័រទុយហ្គាល់បានត្រៀមខ្លួនរួចជាស្រេចក្នុងការពង្រឹងបន្ថែមទៀតនូវការផ្លាស់ប្តូរកម្រិតកំពូលជាមួយប្រទេសចិន ធ្វើឱ្យកាន់តែស៊ីជម្រៅនូវកិច្ចសហប្រតិបត្តិការដ៏សំខាន់ក្នុងវិស័យពាណិជ្ជកម្ម វិទ្យាសាស្ត្រ បច្ចេកវិទ្យា វប្បធម៌ និងការផ្លាស់ប្តូររវាងប្រជាជន និងប្រជាជន ក្នុងចំណោមវិស័យផ្សេងៗទៀត ហើយបន្តជំរុញយ៉ាងសកម្មនូវកិច្ចសហប្រតិបត្តិការក្នុងន័យស្ថាបនារវាងអឺរ៉ុប និងចិន។
ក្នុងអំឡុងពេលនៃកិច្ចពិភាក្សាជាមួយលោក អាន់តូនីយ៉ូ កូស្តា នាយករដ្ឋមន្រ្តីព័រទុយហ្កាល់ លោក ហាន បានចង្អុលបង្ហាញថា ប្រទេសចិនយកចិត្តទុកដាក់យ៉ាងខ្លាំងចំពោះទំនាក់ទំនងមិត្តភាពជាប្រពៃណីរបស់ខ្លួនជាមួយព័រទុយហ្គាល់ ហើយតែងតែជំរុញ និងអភិវឌ្ឍភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិន-ព័រទុយហ្គាល់ តាមទស្សនៈយុទ្ធសាស្ត្ររួម។
លោក កូស្ដា បាននិយាយថា ប្រទេសព័រទុយហ្គាល់ប្រកាន់ខ្ជាប់នូវគោលនយោបាយចិនតែមួយ និងគាំទ្រការអនុវត្ត «ប្រទេសមួយ ប្រព័ន្ធពីរ» នៅទីក្រុងម៉ាកាវ ដោយលោកបាននិយាយបន្ថែមថា ប្រទេសព័រទុយហ្គាល់ និងចិនបានកសាងភាពជាដៃគូដ៏ល្អតាមរយៈវេទិកាម៉ាកាវ។
លោកបានអំពាវនាវឱ្យមានកិច្ចខិតខំប្រឹងប្រែងរួមគ្នាដើម្បីផ្តល់ភាពរឹងមាំកាន់តែខ្លាំងដល់វេទិកាកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសចិន និងប្រទេសនិយាយភាសាព័រទុយហ្គាល់ ជំរុញកិច្ចសហប្រតិបត្តិការជាក់ស្តែងបន្ថែមទៀត និងធ្វើឱ្យកាន់តែស៊ីជម្រៅនូវកិច្ចសហប្រតិបត្តិការដែលមានផលប្រយោជន៍ទៅវិញទៅមករវាងព័រទុយហ្គាល់ និងចិន៕
ប្រភព៖ ទីភ្នាក់ងារសារព័ត៌មានកម្ពុជា
