បរទេស៖ បើទោះបីជាមានបទឈប់បាញ់ជាច្រើនដែលត្រូវបានប្រកាសដោយភាគីជម្លោះរបស់ស៊ូដង់ក៏ដោយ ក៏ភាពតានតឹង និងការប្រយុទ្ធគ្នាយ៉ាងសាហាវមួយចំនួននៅតែបន្តផ្ទុះឡើងនៅក្នុងរដ្ឋធានីខាទូម និងតំបន់ផ្សេងៗទៀត។
យោងតាមអ្នកសារព័ត៌មានស៊ីនហួនៅទីក្រុងខាទូមបានឱ្យដឹងថា ការបាញ់កាំភ្លើង និងការផ្ទុះនៅតែត្រូវបានគេឮនៅក្នុងទីក្រុងខាទូមកាលពីថ្ងៃចន្ទ នៅពេលដែលអ្នកតំណាងមកពីភាគីទាំងពីរស្ថិតនៅក្នុងប្រទេសអារ៉ាប៊ីសាអូឌីត សម្រាប់កិច្ចពិភាក្សាដែលអ្នកសម្រុះសម្រួលសង្ឃឹមថាអាចបញ្ចប់អរិភាពក្នុងរយៈពេលជាងបីសប្តាហ៍ ដែលបានសម្លាប់មនុស្សរាប់រយនាក់ និងផ្លាស់ទីលំនៅរាប់ពាន់នាក់។
ក្រសួងសុខាភិបាលនៃប្រទេសស៊ូដង់បានបញ្ឈប់ការធ្វើបច្ចុប្បន្នភាពចំនួនអ្នកស្លាប់ និងរបួសកាលពីថ្ងៃទី២ ខែឧសភា នៅពេលដែលចំនួនអ្នកស្លាប់មានចំនួន ៥៥០នាក់ និងមនុស្សចំនួន ៤៩២៦នាក់បានរងរបួស។
អ្នកស្រុកនៅទីក្រុងខាទូម ទីក្រុងអ៊ុមឌូរម៉ាន និងទីក្រុងបារី (ទីក្រុងខាទូមខាងជើង) កំពុងស៊ូទ្រាំនឹងការលំបាកយ៉ាងខ្លាំងដែលបង្ហាញពីការផ្គត់ផ្គង់នំប៉័ង ទឹក និងអគ្គិសនី។
មន្ទីរពេទ្យជាច្រើនត្រូវដាច់សេវាដោយសារកង្វះថ្នាំពេទ្យ។ យោងតាមសហភាពគ្រូពេទ្យស៊ូដង់បានឱ្យដឹងថា បុគ្គលិកពេទ្យមិនអាចទៅដល់មន្ទីរពេទ្យបាន ហើយកន្លែងសុខភាពត្រូវបានបំផ្លាញ ឬរឹបអូស ហើយប្រែក្លាយទៅជាបន្ទាយយោធា។
ក្នុងអំឡុងពេលនៃកិច្ចប្រជុំថ្នាក់ពិភពលោកកម្រិតកំពូលនៅថ្ងៃទី២០ ខែមេសា ឆ្នាំ២០២៣ អង្គការសហប្រជាជាតិ (UN) និងអង្គការក្នុងតំបន់រួមទាំងសហភាពអាហ្រ្វិក (AU) សម្ព័ន្ធអារ៉ាប់ និងបណ្តាប្រទេសជិតខាងរបស់ស៊ូដង់បានព្រមព្រៀងគ្នាដាក់សម្ពាធទៅលើភាគីទាំងពីរដែលមានជម្លោះដើម្បីលុបបំបាត់ការបាញ់គ្នា។
ពួកគេបានព្រមព្រៀងគ្នាគាំទ្រភាគីពាក់ព័ន្ធរបស់ស៊ូដង់តាមរយៈយន្តការ AU-UN ដែលដឹកនាំរួមគ្នាសំដៅសម្របសម្រួលសកម្មភាពអន្តរជាតិដើម្បីបញ្ចប់អំពើហិង្សា និងអស្ថិរភាពនៃប្រទេសស៊ូដង់ ទាំងតំបន់ និងទ្វីប។ នេះបើយោងតាមសេចក្តីប្រកាសព័ត៌មានរបស់ AU ។
ក្រុមទំនាក់ទំនងនឹងធ្វើការទំនាក់ទំនងជាមួយភាគីស៊ូដង់ បណ្តាប្រទេសដែលមានឥទ្ធិពលក្នុងតំបន់ និងអន្តរជាតិ ព្រមទាំងអង្គការអន្តរជាតិពាក់ព័ន្ធនានា ហើយសម្របសម្រួលជាមួយអង្គការសង្គ្រោះអន្តរជាតិដើម្បីផ្តល់ជំនួយមនុស្សធម៌ និងផ្នែកវេជ្ជសាស្ត្រជាបន្ទាន់ដល់ពលរដ្ឋ និងជនភៀសខ្លួននៅក្នុងប្រទេសស៊ូដង់៕
ប្រភព៖ ទីភ្នាក់ងារសារព័ត៌មានកម្ពុជា
