បរទេស៖ ប្រធានាធិបតីស៊ីរី លោក បាសារ អាល អាសាដ (Bashar al-Assad) បានសាទរចំពោះគោលជំហរគាំទ្ររបស់ចិនចំពោះប្រទេសស៊ីរី និងតួនាទីរបស់ខ្លួនក្នុងការដោះស្រាយបញ្ហាក្នុងតំបន់សំខាន់ៗ រួមទាំងការផ្សះផ្សាអ៊ីរ៉ង់ និងអារ៉ាប៊ីសាអូឌីតផងដែរ។
លោក អាសាដ បានធ្វើការកត់សម្គាល់ខាងលើនេះក្នុងអំឡុងពេលកិច្ចប្រជុំរបស់លោកជាមួយបេសកជនពិសេសរបស់ប្រទេសចិនទទួលបន្ទុកកិច្ចការមជ្ឈិមបូព៌ា លោក ហ្សៃ ជុន (Zhai Jun) ក្នុងរដ្ឋធានីដាម៉ាស់កាលពីថ្ងៃសៅរ៍។
លោក អាសាដ បាននិយាយថា ប្រទេសស៊ីរីកោតសរសើរចំពោះការគាំទ្រយ៉ាងម៉ឺងម៉ាត់របស់ប្រទេសចិនក្នុងបញ្ហាទាក់ទងនឹងឯករាជ្យជាតិ អធិបតេយ្យភាព និងបូរណភាពទឹកដីរបស់ប្រទេសស៊ីរី។
លោកប្រធានាធិបតីបាននិយាយថា ប្រទេសស៊ីរីទន្ទឹងរង់ចាំការពង្រឹងកិច្ចសហប្រតិបត្តិការជាក់ស្តែងជាមួយប្រទេសចិនក្នុងវិស័យផ្សេងៗក្នុងក្របខ័ណ្ឌនៃគំនិតផ្តួចផ្តើមខ្សែក្រវ៉ាត់ និងផ្លូវ។
ទន្ទឹមនឹងនោះដែរ លោក អាសាដ បានអបអរសាទរដល់ប្រទេសចិនដែលទទួលបានជោគជ័យក្នុងការសម្រុះសម្រួលការផ្សះផ្សារវាងអ៊ីរ៉ង់ និងអារ៉ាប៊ីសាអូឌីត ដោយលោកបាននិយាយថា វានឹងមានឥទ្ធិពលសំខាន់ និងវិជ្ជមានចំពោះស្ថានភាពក្នុងតំបន់ និងអន្តរជាតិ។
ដោយសម្តែងការកោតសរសើរចំពោះតួនាទីវិជ្ជមានរបស់ប្រទេសចិនក្នុងការលើកកម្ពស់ទំនាក់ទំនងរបស់ប្រទេសស៊ីរីជាមួយបណ្តាប្រទេសអារ៉ាប់ផ្សេងទៀតនោះ លោក អាសាដ បាននិយាយថា ប្រទេសចិនស្វាគមន៍ក្នុងការដើរតួនាទីកាន់តែធំក្នុងការរក្សាសន្តិភាព និងស្ថិរភាពក្នុងតំបន់។
ចំណែកលោក ហ្សៃ បាននិយាយថា ក្នុងរយៈពេលប៉ុន្មានឆ្នាំចុងក្រោយនេះទំនាក់ទំនងរវាងចិន-ស៊ីរីបានបន្តអភិវឌ្ឍ ហើយការជឿទុកចិត្តគ្នាខាងផ្នែកនយោបាយត្រូវបានពង្រឹងជាបន្តបន្ទាប់ ដោយលោកបានសង្កត់ធ្ងន់ថា ប្រទេសចិនមានឆន្ទៈក្នុងការធ្វើការងារជាមួយប្រទេសស៊ីរីដើម្បីគាំទ្រគ្នាទៅវិញទៅមកយ៉ាងរឹងមាំរវាងប្រទេសទាំងពីរសម្រាប់ផលប្រយោជន៍ស្នូល និងជំរុញកិច្ចសហប្រតិបត្តិការមិត្តភាពដើម្បីសម្រេចបាននូវវឌ្ឍនភាពថ្មី។
លោក ហ្សៃ បានកត់សម្គាល់ថា ឯករាជ្យភាព អធិបតេយ្យភាព និងបូរណភាពទឹកដីរបស់ប្រទេសស៊ីរីគួរតែត្រូវបានគោរព និងរក្សាបាន ដោយជំរុញឱ្យសហរដ្ឋអាមេរិក និងលោកខាងលិចដកទណ្ឌកម្មឯកតោភាគី និងការបិទផ្លូវសេដ្ឋកិច្ចប្រឆាំងនឹងស៊ីរីជាបន្ទាន់។
លោកក៏បានអំពាវនាវឱ្យសហគមន៍អន្តរជាតិផ្តល់ជំនួយមនុស្សធម៌ និងអភិវឌ្ឍដោយស្មោះស្ម័គ្រដល់ប្រជាជនស៊ីរី ដោយបានកត់សម្គាល់ថា ប្រទេសចិនមានឆន្ទៈបន្តដើរតួនាទីស្ថាបនាក្នុងការកែលម្អទំនាក់ទំនងស៊ីរីជាមួយបណ្តាប្រទេសអារ៉ាប់ផ្សេងទៀត៕
ប្រភព៖ នាយកដ្ឋានផ្សព្វផ្សាយអប់រំ
