បរទេស៖ អ្នកតំណាងប្រទេសជាសមាជិកអាស៊ានចំនួន៥ គឺប្រទេសម៉ាឡេស៊ី ប្រ៊ុយណេ ឥណ្ឌូណេស៊ី សិង្ហបុរី និងថៃ គ្រោងនឹងជួបប្រជុំគ្នាក្នុងប្រទេសសិង្ហបុរីពីថ្ងៃទី៧-៨ ខែមិថុនា ដើម្បីពិភាក្សាគ្នាអំពីបញ្ហាអ័ព្ទក្នុងបរិយាកាសឆ្លងដែន។
កិច្ចប្រជុំនោះនឹងក្លាយជាកិច្ចប្រជុំលើកទី២៤ ចាប់តាំងពីកិច្ចព្រមព្រៀងអាស៊ានស្តីពីការបំពុលអ័ព្ទក្នុងបរិយាកាសឆ្លងដែនត្រូវបានចុះហត្ថលេខានៅក្នុងឆ្នាំ២០០២។
រដ្ឋមន្ត្រីក្រសួងធនធានធម្មជាតិ បរិស្ថាន និងការប្រែប្រួលអាកាសធាតុរបស់ប្រទេសម៉ាឡេស៊ី លោក នីក ណាហ្សមី នីក អាម៉ាដ (Nik Nazmi Nik Ahmad) បាននិយាយថា ប្រទេសម៉ាឡេស៊ីទន្ទឹងរង់ចាំពិភាក្សាអំពីបញ្ហាអាកាសធាតុក្តៅ លទ្ធភាពនៃឧប្បត្តិហេតុអ័ព្ទក្នុងបរិយកាស និងយុទ្ធសាស្ត្រដើម្បីឆ្លើយតប។
លោកបាននិយាយបន្ថែមថា អាស៊ាននឹងបង្កើតផែនទីបង្ហាញផ្លូវមួយដែលបានកែសម្រួលសម្រាប់កិច្ចសហប្រតិបត្តិការអ័ព្ទក្នុងបរិយាកាសឆ្លងដែន ដើម្បីកែលម្អគោលការណ៍ណែនាំដែលមានស្រាប់។
កម្រិតគ្រោះថ្នាក់នៃផ្សែងអ័ព្ទក្នុងបរិយាកាសដោយសារតែការដុតបានគ្របដណ្តប់ផ្នែកភាគខាងជើងនៃប្រទេសថៃ មីយ៉ាន់ម៉ា និងឡាវ ចាប់តាំងពីដើមឆ្នាំនេះ។
រដ្ឋាភិបាលម៉ាឡេស៊ីនឹងបើកកិច្ចប្រជុំគណៈកម្មាធិការជាតិ ស្តីពីអ័ព្ទ និងអាកាសធាតុស្ងួត នៅថ្ងៃទី២៦ ខែឧសភា ដើម្បីរក្សាបាននូវការអភិវឌ្ឍ៕
ប្រភព៖ ទីភ្នាក់ងារសារព័ត៌មានកម្ពុជា
