ចិន៖ ប្រទេសចិន និងសិង្ហបុរី នឹងធ្វើសមយុទ្ធយោធារួមគ្នាក្នុងសប្តាហ៍នេះ ដែលជាសមយុទ្ធរួមគ្នាលើកដំបូងចាប់តាំងពីឆ្នាំ២០២១ ខណៈដែលទីក្រុងប៉េកាំងពង្រឹងទំនាក់ទំនងការពារជាតិ និងសន្តិសុខជាមួយប្រទេសនៅតំបន់អាស៊ីអាគ្នេយ៍ ជាតំបន់ដែលមានសម្ព័ន្ធមិត្តដ៏រឹងមាំរបស់សហរដ្ឋអាមេរិក។
កាលពីថ្ងៃចន្ទ នៅក្នុងសេចក្តីថ្លែងការណ៍មួយនៅលើគេហទំព័ររបស់ក្រសួងការពារជាតិចិនបានឲ្យដឹងថា កងទ័ពជើងទឹកចិននឹងដាក់ពង្រាយនាវាចម្បាំងផ្ទុកកាំជ្រួចមីស៊ីលឈ្មោះ Yulin និងនាវារុករករ៉ែឈ្មោះ Chibi ទៅចូលរួមសមយុទ្ធដែនសមុទ្ររួមគ្នាដែលនឹងចាប់ផ្តើមពីចុងខែមេសា ដល់ដើមខែឧសភា ប៉ុន្តែមិនបានបញ្ជាក់ពីទីតាំងច្បាស់លាស់ទេ។
កាលពីពីរឆ្នាំមុន ប្រទេសចិន និងសិង្ហបុរីបានធ្វើសមយុទ្ធយោធារួមគ្នាមួយនៅក្នុងដែនទឹកអន្តរជាតិនៅ ភាគខាងត្បូងបំផុតនៃសមុទ្រចិនខាងត្បូង បន្ទាប់ពីមានការធ្វើឲ្យប្រសើរឡើងនូវកិច្ចព្រមព្រៀងការពារជាតិទ្វេភាគីកាលពីឆ្នាំ២០១៩ ដោយរួមបញ្ចូលសមយុទ្ធទ្រង់ទ្រាយធំសម្រាប់កងទ័ព កងទ័ពជើងទឹក និងកងទ័ពអាកាសរបស់ពួកគេ។
កិច្ចសហប្រតិបត្តិការយោធារវាងចិន និងសិង្ហបុរីកាន់តែស៊ីជម្រៅកើតឡើងនៅពេលដែលភាពតានតឹងកាន់តែខ្លាំងនៅសមុទ្រចិនខាងត្បូង ដែលលាតសន្ធឹងលើផ្ទៃទឹក ៣,៥លានគីឡូម៉ែត្រការ៉េ ហើយជារឿយៗត្រូវបានធ្វើដំណើរឆ្លងកាត់ដោយកងនាវាចរលោកខាងលិច រួមទាំងនាវាសហរដ្ឋអាមេរិក ដែលធ្វើប្រតិបត្តិការនាវាចរណ៍ដោយសេរី។ ប៉ុន្តែការធ្វើដំណើរឆ្លងកាត់បែបនេះបានធ្វើឲ្យប្រទេសចិនមិនសប្បាយចិត្ត ដែលចិនទាមទារស្ទើរតែទាំងអស់នៃសមុទ្រចិនខាងត្បូង ទោះបីជាមានសេចក្តីសម្រេចអន្តរជាតិផ្ទុយពីនេះក៏ដោយ៕
ប្រភព៖ អគ្កស្នងការដ្ឋាននគរបាលជាតិ
