បរទេស៖ បន្ទាប់ពីមានការកើនឡើងនៃចំនួនអ្នកឆ្លងជំងឺកូវីដ១៩ បន្ទាប់ពីថ្ងៃឈប់សម្រាកបុណ្យសង្រ្កាន្តឆ្នាំថ្មី ក្រសួងសុខាភិបាលថៃបានប្រកាសថា ខ្លួនបានត្រៀមលក្ខណៈរួចរាល់ហើយក្នុងការទទួលអ្នកជំងឺកូវីដ១៩ ដែលមានសក្តានុពល។
ក្រសួងបានរៀបចំវិធានការថែទាំសុខភាពមួយចំនួន ដូចជាថ្នាំពេទ្យ សម្ភារៈពេទ្យ និងគ្រែមន្ទីរពេទ្យគ្រប់គ្រាន់សម្រាប់ដោះស្រាយស្ថានការណ៍។
អ្នកជំងឺដែលធ្វើតេស្តវិជ្ជមានសម្រាប់ជំងឺកូវីដ១៩ ដោយប្រើតេស្តអង់ទីហ្សែនអាចចុះឈ្មោះដើម្បីជួបគ្រូពេទ្យតាមប្រព័ន្ធអនឡាញ ដោយអាចសាកសួរ និងបង់ប្រាក់សម្រាប់ថ្នាំរបស់ពួកគេ និងទទួលបានការចែកចាយថ្នាំដោយឥតគិតថ្លៃ។ មានកម្មវិធីជាច្រើនដែលអាចប្រើបានសម្រាប់សេវាកម្មនេះជាមួយនឹងកម្មវិធីទូរស័ព្ទដូចជា «Total Telemed» ទទួលយកអ្នកជំងឺកូវីដគ្រប់ប្រភេទ និងកម្មវិធី «MorDee» កម្មវិធី «Saluber MD» និងកម្មវិធី «Clicknic» ដែលទទួលយកអ្នកជំងឺមិនមែននៅក្នុងក្រុមអ្នកជំងឺ៦០៨។ ក្រុមអ្នកជំងឺ៦០៩ សំដៅទៅលើអ្នកដែលមានអាយុលើសពី ៦០ឆ្នាំ អ្នកដែលមានជំងឺរ៉ាំរ៉ៃមួយ ឬច្រើន និងស្ត្រីមានផ្ទៃពោះ។
ក្រុមមន្ត្រីនឹងទាក់ទងទៅអ្នកជំងឺដើម្បីបញ្ជាក់អត្តសញ្ញាណរបស់ពួកគេ ដើម្បីពិនិត្យ និងវាយតម្លៃរោគសញ្ញាដំបូង និងផ្តល់ដំបូន្មានវេជ្ជសាស្រ្តតាមប្រព័ន្ធអនឡាញសម្រាប់ការថែទាំខ្លួនឯង។ ប្រសិនបើចាំបាច់ មន្ត្រីអាចសម្រេចចិត្តផ្តល់ថ្នាំដល់អ្នកជំងឺ ដោយអ្នកខ្លះនឹងទទួលបានថ្នាំ Favipiravir ឬថ្នាំ Molnupiravir អាស្រ័យទៅតាមស្ថានភាពរបស់ពួកគេ និងការធ្វើរោគវិនិច្ឆ័យរបស់គ្រូពេទ្យ។
បន្ទាប់ពីការថែទាំអស់រយៈពេល ៤៨ម៉ោង មន្ត្រីនឹងទាក់ទងអ្នកជំងឺម្តងទៀតដើម្បីសាកសួរអំពីរោគសញ្ញារបស់ពួកគេ និងផ្តល់ការណែនាំសម្រាប់ការថែទាំខ្លួនឯង។ ប្រសិនបើរោគសញ្ញាកាន់តែអាក្រក់ទៅក្នុងអំឡុងពេលនោះ ព័ត៌មានរបស់ពួកគេនឹងត្រូវបានបញ្ជូនបន្តទៅនាយកដ្ឋានគ្រប់គ្រងជំងឺដើម្បីធ្វើការព្យាបាលបន្ថែម។
ជនពិការដែលអាចទំនាក់ទំនងតាមប្រព័ន្ធអនឡាញបាន និងមិនមានហានិភ័យនៃការឆ្លងមេរោគក៏អាចទទួលបានការថែទាំផងដែរ អាស្រ័យទៅលើការធ្វើរោគវិនិច្ឆ័យរបស់ពួកគេ។
កិច្ចខិតខំប្រឹងប្រែងរួមគ្នារវាងការិយាល័យសន្តិសុខជាតិ និងអ្នកផ្តល់សេវាថែទាំសុខភាពតាមប្រព័ន្ធឌីជីថលនេះ មានគោលបំណងធានាថា អ្នកជំងឺកូវីដ១៩ ទទួលបានការថែទាំ និងថ្នាំដែលពួកគេត្រូវការ ជាមួយនឹងការចែកចាយថ្នាំដោយឥតគិតថ្លៃនៅតាមតំបន់ជាក់លាក់នៃទីក្រុងបាងកក៕
ប្រភព៖ ក្រសួងព័ត៌មាន
