ថៃ ជម្រុញអោយក្រសួងពាក់ព័ន្ធដោះស្រាយបញ្ហាបំពុលបរិយាកាស

បរទេស៖ រដ្ឋាភិបាលថៃបានសង្កត់ធ្ងន់ទៅលើសារៈសំខាន់នៃការដោះស្រាយការបំពុលបរិយាកាសក្នុងរយៈពេលវែង តាមរយៈវិធានការមួយចំនួន ដូចជាការដាំដើមឈើឡើងវិញ និងការការពារបរិស្ថានជាដើម។

នាយករដ្ឋមន្ត្រីថៃ លោក ប្រាយុធ ចាន់អូចា បាននិយាយថា ក្រសួងធនធានធម្មជាតិ និងបរិស្ថាន និងទីភ្នាក់ងារផ្សេងទៀតបាននឹងកំពុងធ្វើការងារដើម្បីពង្រីកតំបន់ព្រៃឈើ ដោយផ្អែកទៅលើគំរូរបស់ប្រទេសស៊ុយអែត។

លោកបានកត់សម្គាល់ថា ប្រទេសស៊ុយអែតអាចបង្កើនគម្របព្រៃឈើរបស់ខ្លួនពី ២៥% ទៅដល់ ៧៥% ។ ទីបំផុត វិធានការនេះបានធ្វើឱ្យឈើក្លាយជាទំនិញនាំចេញកំពូលមួយរបស់ប្រទេសស៊ុយអែត ដែលធ្វើឱ្យប្រទេសនេះក្លាយជាអ្នកនាំចេញឈើធំជាងគេលំដាប់ទីបីរបស់ពិភពលោក។

លើសពីនេះទៀត លោកបានជំរុញឱ្យសាធារណជនចូលរួមដាំព្រៃសហគមន៍ និងបម្រុងដីសម្រាប់ដាំដើមឈើ។

លោក ប្រាយុធ ក៏បានសង្កត់ធ្ងន់ទៅលើតម្រូវការក្នុងការដោះស្រាយការបំភាយការបំពុលបរិស្ថាន និងការបំពុលឧស្សាហកម្ម ហើយលោកបានព្រមានដល់សាធារណជនប្រឆាំងនឹងការដុតភ្លើងនៅខាងក្រៅដែលអាចនាំឱ្យមានផលប៉ះពាល់តាមផ្លូវច្បាប់។

លោកបាននិយាយបន្ថែមថា រដ្ឋាភិបាលបានចាត់វិធានការដើម្បីកាត់បន្ថយផលប៉ះពាល់នៃការឡើងកំដៅផែនដី ដូចជាការត្រៀមខ្លួនសម្រាប់ព្រឹត្តិការណ៍អ៊ែលនីណូ (El Nino) ជាដើម។

ប្រសិនបើឥទ្ធិពលនៃព្រឹត្តិការណ៍អ៊ែលនីណូកាន់តែខ្លាំង វាអាចបណ្តាលឱ្យសីតុណ្ហភាពកើនឡើងយ៉ាងហោចណាស់ ០,៨អង្សាសេ ជាមួយនឹងព្រឹត្តិការណ៍ «ស៊ុបពើរអ៊ែលនីណូ (Super El Nino)» ដែលបណ្តាលឱ្យសីតុណ្ហភាពកើនឡើងពី ២-៣អង្សាសេ លើសពីកម្រិតមធ្យមនៅក្នុងតំបន់មួយចំនួន។

រហូតមកដល់ពេលនេះ រដ្ឋាភិបាលបានរៀបចំការត្រៀមលក្ខណៈសម្រាប់ហានិភ័យដែលអាចកើតមានទាំងនេះ ហើយបានចេញបទបញ្ជាទៅកាន់ទីភ្នាក់ងារទទួលខុសត្រូវនានាដើម្បីដោះស្រាយ៕

ប្រភព៖ ក្រសួងព័ត៌មាន