ភ្នំពេញ៖ ធនាគារអភិវឌ្ឍន៍អាស៊ី (ADB) បានសម្រេចផ្តល់ប្រាក់ចំនួន ២០,៥ ពាន់លានដុល្លារពីធនធានរបស់ខ្លួនក្នុងឆ្នាំ ២០២២ ដើម្បីជួយតំបន់អាស៊ី និង ប៉ាស៊ីហ្វិក បន្តងើបឡើងវិញពីជំងឺរាតត្បាត កូវីដ១៩ ទោះបីជាមានលេចឡើងវិបត្តិសេដ្ឋកិច្ច និងវិបត្តិថ្មីៗយ៉ាងណាក្តី។ នេះបើយោងតាមសេចក្ដីប្រកាសព័ត៌មានរបស់ ADB ។
លោក Masatsugu Asakawa ប្រធាន ADB មានប្រសាសន៍ថា៖«ការគាំទ្ររបស់យើងក្នុងឆ្នាំ ២០២២ បានជួយប្រទេសសមាជិកកំពុងអភិវឌ្ឍន៍ (DMCs) របស់យើងដើម្បីចៀសចេញពីផលប៉ះពាល់ភ្លាមៗនៃវិបត្តិទាំងនេះ ហើយពង្រឹងភាពធន់យូរអង្វែងរបស់ប្រទេសដោយផ្តោតលើវិស័យសំខាន់ៗ ដូចជា ការប្រែប្រួលអាកាសធាតុ និងសន្តិសុខស្បៀង»។ លោកបានបញ្ជាក់ថា ទឹកប្រាក់ចំនួន ២០,៥ ពាន់លានដុល្លារ រួមមានប្រាក់កម្ចី និងការធានា ប្រាក់ជំនួយ ការវិនិយោគ ទុន និង ជំនួយបច្ចេកទេសដែលផ្តល់ដល់រដ្ឋាភិបាល និង វិស័យឯកជន។ ADB បានប្រមូលថវិកាបន្ថែម ១១,៤ ពាន់លានដុល្លារជា សហហិរញ្ញប្បទាន។ជាមួយគ្នានេះ ADB បានសម្រេចផ្តល់ហិរញ្ញប្បទានចំនួន ៦,៧ ពាន់លានដុល្លារសម្រាប់ការកាត់បន្ថយផលប៉ះពាល់ និងការបន្សាំនឹងអាកាសធាតុក្នុងឆ្នាំ ២០២២ ដែលជាវឌ្ឍនភាពឆ្ពោះទៅរកមហិច្ឆតារបស់ខ្លួន ក្នុងការផ្តល់ហិរញ្ញប្បទានអាកាសធាតុចំនួន ១០០ ពាន់លានដុល្លារ ក្នុងកំឡុងឆ្នាំ ២០១៩-២០៣០។
ដើម្បីដោះស្រាយវិបត្តិស្បៀងអាហារដែលកាន់តែធ្ងន់ធ្ងរក្នុងតំបន់ ADB បានផ្តល់ប្រាក់ចំនួន ៣,៧ ពាន់លានដុល្លារ ក្រោមកម្មវិធីសន្តិសុខស្បៀងចំនួន ១៤ ពាន់លានដុល្លាររបស់ខ្លួន ដោយផ្តល់ជំនួយ ស្បៀង អាហារសំខាន់ៗសម្រាប់ប្រជាជនដែលត្រូវការជំនួយបំផុត និង ពង្រឹងប្រព័ន្ធផលិតកម្មស្បៀង។ ទន្ទឹមនេះ ដើម្បីគាំទ្រដល់ការងើបឡើងវិញនៃសេដ្ឋកិច្ច ADB បានផ្តល់ហិរញ្ញប្បទានសម្រាប់កំណែទម្រង់ ស្ថាប័ន ពង្រឹងការផ្តល់សេវាសាធារណៈ និងកំណើនក្នុងវិស័យសេដ្ឋកិច្ចសំខាន់ៗ។ ការសម្រេចផ្តល់ ហិរញ្ញប្បទាន ចំនួន ៣,៩ ពាន់លានដុល្លាររបស់ ADB ដល់វិស័យឯកជន រួមមានការគាំទ្រសន្ធនីយភាព មូលដ្ឋាន ដល់សហគ្រាសដែលកំពុងប្រឈមនឹងបរិយាកាសធុរកិច្ចដ៏លំបាក។
បើតាមរបាយការណ៍បានឱ្យដឹងថា ADB បានធ្វើការវិនិយោគយ៉ាងទូលំទូលាយលើហេដ្ឋារចនាសម្ព័ន្ធប្រកបដោយ គុណភាព ក៏ដូចជាវិស័យអប់រំ សុខាភិបាល និងវិស័យសង្គមផ្សេងទៀត ដែលរួមចំណែកដល់ការកសាង ភាពធន់ទូទៅនៃសេដ្ឋកិច្ច។ ចំពោះ ការលើកកម្ពស់សមភាពយេនឌ័រនៅតែជាអាទិភាពក្នុងការងាររបស់ ADB ដោយ ៩៧ភាគរយ នៃប្រតិបត្តិការរបស់ADBក្នុងឆ្នាំ ២០២២ បានចូលរួមចំណែកក្នុងផ្នែកនេះ។ ប្រតិបត្តិការទាំងនោះរួមមានការផ្តួច ផ្តើមគំនិតដើម្បីកែលម្អលទ្ធភាពទទួលបានការងារប្រកបដោយគុណភាពរបស់ស្ត្រី ជំរុញភាពជាសហគ្រិន របស់ស្ត្រី និង កសាងភាពធន់របស់ស្ត្រីទៅនឹងការប្រែប្រួលអាកាសធាតុ។
របាយការណ៍ប្រចាំឆ្នាំ ២០២២ ផ្តល់ព័ត៌មានលម្អិតអំពីរបៀបដែល ADB កំពុងវិវឌ្ឍន៍ ដើម្បីឆ្លើយ តបនឹងតម្រូវការដែលប្រែប្រួល និង ស្មុគស្មាញ នៃប្រទេសសមាជិកកំពុងអភិវឌ្ឍន៍របស់ខ្លួន។ ទាំងនោះរួមបញ្ចូលវិធានការដើម្បីទទួលបានធនធានកាន់តែច្រើន ដើម្បីគាំទ្រដល់ការអភិវឌ្ឍក្នុងតំបន់ តាមរយៈការត្រួតពិនិត្យជាបន្ត នៃក្របខ័ណ្ឌភាពគ្រប់គ្រាន់នៃដើមទុន ក៏ដូចជាកំណែទម្រង់ស្ថាប័ន ជារចនាសម្ព័ន្ធនិងមិនមែនរចនាសម្ព័ន្ធ របស់ADB ដោយប្រើគំរូប្រតិបត្តិការថ្មី។
លោក Asakawa បានថ្លែងបញ្ជាក់ថា៖ «ខ្ញុំមានទំនុកចិត្តថា កំណែទម្រង់ទាំងនេះនឹងធានាថា ADB ផ្តល់នូវផលជះកាន់តែខ្លាំងនៅក្នុងតំបន់ រួមទាំងតាមរយៈការពង្រីកការផ្តល់ហិរញ្ញប្បទានអាកាសធាតុ ការកៀរគរការវិនិយោគពីវិស័យឯកជនកាន់តែច្រើននិងការផ្តល់នូវដំណោះស្រាយអភិវឌ្ឍន៍ទូលំទូលាយ ដើម្បីឆ្លើយតបទៅនឹងតម្រូវការរបស់អតិថិជន»៕
ប្រភព៖ ទីភ្នាក់ងារសារព័ត៌មានកម្ពុជា
