បរទេស៖ ប្រធានទីភ្នាក់ងារគោលនយោបាយពាណិជ្ជកម្មរបស់ក្រសួងពាណិជ្ជកម្មឥណ្ឌូណេស៊ី លោក កាសាន់ បានព្យាករថា ពាណិជ្ជកម្មរបស់ប្រទេសឥណ្ឌូណេស៊ី នឹងនៅតែមានអតិរេកពីតម្លៃ ៣៨,៣ប៊ីលាន ទៅ ៣៨,៥ប៊ីលានដុល្លារអាម៉េរិកនៅក្នុងឆ្នាំ២០២៣។
យោងតាមមន្ត្រីរូបនេះបានឱ្យដឹងថា វានៅតែមានលទ្ធភាពដែលឥណ្ឌូណេស៊ីនឹងនៅតែមានអតិរេកនៅក្នុងសមតុល្យពាណិជ្ជកម្មនៅឆ្នាំក្រោយ។
លោកបាននិយាយបន្តថា អត្រាកំណើននេះនឹងអាស្រ័យទៅលើស្ថានភាពដែលនឹងត្រូវប្រឈមមុខ រួមទាំងបណ្តាប្រទេសដែលជាគោលដៅសម្រាប់ការនាំចេញផងដែរ។
ជាមួយនឹងអតិរេកពាណិជ្ជកម្មនេះ ក្រសួងពាណិជ្ជកម្មកំពុងកំណត់ទិសដៅនៃកំណើនការនាំចេញផលិតផលមិនមែនប្រេង និងឧស្ម័ននៅកម្រិតពី ៣,៩% ទៅ ៤,៧% នៅឆ្នាំក្រោយ។
ទន្ទឹមនឹងនេះដែរ ការនាំចេញប្រេង និងឧស្ម័នត្រូវបានគេព្យាករថានឹងកើនឡើងពី ៦,៨% ទៅ ៨%។
លោកបាននិយាយបន្ថែមថា ក្នុងយុទ្ធសាស្ត្រនៃការបង្កើនការនាំចេញ លោក កាសាន់ បានលើកឡើងថា ទិសដៅគោលនយោបាយ គឺមានគោលបំណងអភិវឌ្ឍការនាំចេញទំនិញ និងសេវាបន្ថែមដើម្បីបង្កើនផលិតភាពសេដ្ឋកិច្ច។
ក្រសួងនោះក៏បានផ្តោតសំខាន់ទៅលើកិច្ចខិតខំប្រឹងប្រែងដើម្បីនាំយកទំនិញឥណ្ឌូណេស៊ីចូលទៅក្នុងទីផ្សារនាំចេញមិនមែនជាប្រពៃណីនៅក្នុងបណ្តាប្រទេសនៅតំបន់អាហ្វ្រិក មជ្ឈិមបូព៌ា និងអាស៊ីខាងត្បូង។
លោក កាសាន់ បាននិយាយថា ដើម្បីពង្រឹងទីផ្សារក្នុងស្រុក យើងមានវិធានការដោះស្រាយពាណិជ្ជកម្មចំនួន១៨ ដែលស្នើឡើងដោយប្រទេសឥណ្ឌូណេស៊ី ដែលរួមមានវិធានការចំនួន១០ ប្រឆាំងនឹងការលក់បង្ខូចថ្លៃ និងវិធានការការពារខ្លួនឯងចំនួន៨៕
ប្រភព៖ ក្រសួងព័ត៌មាន
