បរទេស៖ រដ្ឋាភិបាលសហរដ្ឋអាមេរិកមិនបានលើកទឹកចិត្តដល់កងទ័ពរបស់ទីក្រុងគៀវឱ្យវាយលុកទៅលើទឹកដីរុស្ស៊ីទេ ប៉ុន្តែនឹងបន្តផ្តល់ជំនួយយោធាដល់អ៊ុយក្រែន ដែលខ្លួនត្រូវការដើម្បីការពារខ្លួន។ នេះបើយោងតាមរដ្ឋមន្ត្រីការបរទេសសហរដ្ឋអាមេរិក លោក អាន់តូនី ប្ល៊ីនខេន បានប្រាប់ដល់ក្រុមអ្នកសារព័ត៌មានបន្ទាប់ពីកិច្ចចរចារវាងសហរដ្ឋអាមេរិក និងអូស្ត្រាលីនៅទីក្រុងវ៉ាស៊ីនតោនកាលពីថ្ងៃអង្គារ។
យោងតាមសម្ដីរបស់លោកបានឱ្យដឹងថា ទីក្រុងវ៉ាស៊ីនតោន «មិនបានលើកទឹកចិត្ត ឬអនុញ្ញាតឱ្យអ៊ុយក្រែនធ្វើការវាយប្រហារនៅខាងក្នុងទឹកដីរបស់រុស្ស៊ីនោះទេ»។
ទោះបីជាយ៉ាងណាក៏ដោយ លោកបាននិយាយបន្ថែមថា សហរដ្ឋអាមេរិក និងសម្ព័ន្ធមិត្តបានប្តេជ្ញាចិត្តក្នុងការផ្តល់ឱ្យរដ្ឋាភិបាលទីក្រុងគៀវនូវ «ឧបករណ៍ដែលពួកគេត្រូវការដើម្បីការពារខ្លួន ការពារទឹកដី និងការពារសេរីភាពរបស់ពួកគេ»៕
ប្រភព៖ ក្រសួងព័ត៌មាន
