បរទេស៖ កូរ៉េខាងជើងបានបាញ់គ្រាប់រ៉ុក្កែតចូលទៅក្នុងតំបន់ការពារដែនសមុទ្ររយៈពេលពីរថ្ងៃជាប់គ្នាកាលពីថ្ងៃអង្គារ ដើម្បីឆ្លើយតបទៅនឹងសមយុទ្ធបាញ់គ្រាប់ពិតរវាងកូរ៉េខាងត្បូង និងសហរដ្ឋអាមេរិក។
អគ្គសេនាធិការចម្រុះរបស់កូរ៉េខាងត្បូង (JCS) បាននិយាយថា កូរ៉េខាងជើងបានបាញ់គ្រាប់រ៉ុក្កែតប្រហែល ៩០គ្រាប់ ចាប់ពីម៉ោង ១០:០០ព្រឹករហូតដល់ពេលរសៀលពីតំបន់កូសុងនៅក្នុងខេត្តកាងវ៉ុន ឆ្ពោះទៅសមុទ្រខាងកើត។ ការបាញ់ប្រហែល ១០គ្រាប់ទៀតត្រូវបានរកឃើញបន្ទាប់ពីម៉ោង ៦:០០ល្ងាច ពីតំបន់គុមង៉ាងនៅក្នុងខេត្តដូចគ្នា។
JSC បាននិយាយបន្ថែមថា គ្រាប់ផ្លោងបានធ្លាក់ចូលទៅក្នុងតំបន់ការពារដែនសមុទ្រភាគខាងជើងនៃខ្សែបន្ទាត់ព្រំដែនភាគខាងជើងដែលជាព្រំដែនសមុទ្រជាក់ស្តែង ដែលជាការបំពានទៅលើកិច្ចព្រមព្រៀងយោធាអន្តរកូរ៉េឆ្នាំ២០១៨ ដើម្បីកាត់បន្ថយភាពតានតឹងនៅតាមព្រំដែន។
កូរ៉េខាងជើងបានបញ្ជាក់ពីការបាញ់នៅថ្ងៃបន្ទាប់ ដោយបាននិយាយថា ខ្លួនបានបាញ់គ្រាប់រ៉ុក្កែតចំនួន ៨២គ្រាប់ក្នុងរយៈពេល ៨ម៉ោងកន្លះ ដើម្បីជាការឆ្លើយតបចំពោះសមយុទ្ធយោធារវាងកូរ៉េខាងត្បូង និងសហរដ្ឋអាមេរិកនៅជិតព្រំដែន។
JCS បាននិយាយថា «ការបាញ់គ្រាប់រ៉ុក្កែតជាបន្តបន្ទាប់ចូលទៅក្នុងតំបន់ការពារដែនសមុទ្រភាគខាងកើត គឺជាការបំពានយ៉ាងច្បាស់នៃកិច្ចព្រមព្រៀងយោធាថ្ងៃទី១៩ ខែកញ្ញា ហើយយើងសូមជំរុញឱ្យកូរ៉េខាងជើងបញ្ឈប់ជាបន្ទាន់»។ កាលពីថ្ងៃចន្ទ កូរ៉េខាងជើងបានបាញ់គ្រាប់រ៉ុក្កែតប្រមាណ ១៣០គ្រាប់ចូលទៅក្នុងតំបន់ការពារខាងកើត និងខាងលិច៕
ប្រភព៖ ក្រសួងព័ត៌មាន
