បរទេស៖ អត្រាអតិផរណានៅក្នុងប្រទេសឡាវបានកើនឡើងដល់ចំនួន ៣៨,៤៦% នៅក្នុងខែវិច្ឆិកា ដែលជាកម្រិតខ្ពស់បំផុតក្នុងរយៈពេល ២៣ឆ្នាំចុងក្រោយនេះ។ នេះបើយោងតាមការិយាល័យស្ថិតិនៃក្រសួងផែនការ និងវិនិយោគរបស់ប្រទេសឡាវ។
អត្រាដ៏ខ្ពស់នេះបណ្តាលមកពីការកើនឡើងនៃតម្លៃទំនិញ ដោយក្នុងនោះរួមមានតម្លៃម្ហូបអាហារ និងភេសជ្ជៈគ្មានជាតិអាល់កុលដែលបានកើនឡើង ៤២,៦៨% គ្រឿងស្រវឹង និងថ្នាំជក់ ២២,៥៩% សម្លៀកបំពាក់ និងស្បែកជើង ២៥,៦៧% សេវាកម្មលំនៅដ្ឋាន ទឹកស្អាត អគ្គិសនី និងឧស្ម័នប្រើប្រាស់ប្រចាំថ្ងៃ ២៤,០៨% និងឧបករណ៍ប្រើប្រាស់ក្នុងផ្ទះ ៣០,៤១%។
តម្លៃនៃសេវាវេជ្ជសាស្រ្ត និងឱសថកើនឡើង ៤២,០៥% ការដឹកជញ្ជូន ៥៥,៤៣% ប្រៃសណីយ៍ និងទូរគមនាគមន៍ ១២,៤៤% សេវាកម្សាន្ត និងកន្លែងស្នាក់នៅ ១៨,៥១% សេវាអប់រំ ១៣,២៦% សណ្ឋាគារ និងភោជនីយដ្ឋាន ៣០,៩៧% ព្រមទាំងទំនិញ និងសេវាកម្មផ្សេងៗ ២៥,៥១%។
ការកើនឡើងអតិផរណានេះបានបង្ហាញថា វិធានការដែលរដ្ឋាភិបាលឡាវបានអនុវត្តនាពេលកន្លងមក គឺមិនមានប្រសិទ្ធភាពដូចការរំពឹងទុកនោះទេ។ សេដ្ឋកិច្ចប្រទេសនេះបន្តប្រឈមមុខនឹងការលំបាកដែលប៉ះពាល់ដល់ផលិតកម្ម និងជីវភាពរស់នៅរបស់ប្រជាជន៕
ប្រភព៖ ក្រសួងព័ត៌មាន
