បរទេស៖ រដ្ឋមន្ត្រីការបរទេសហ្វាំងឡង់ លោក ពេកកា ហាវីស្តូ បាននិយាយនៅក្នុងសន្និសីទសារព័ត៌មានមួយកាលពីថ្ងៃចន្ទថា ប្រទេសហ្វាំងឡង់មិនមានចេតនាក្នុងការដាក់ពង្រាយអាវុធនុយក្លេអ៊ែររបស់អង្គការណាតូនៅលើទឹកដីរបស់ខ្លួនឡើយនៅពេលដែលខ្លួនបានចូលជាសម្ព័ន្ធមិត្តរបស់អង្គការនេះ។
លោកបាននិយាយថា «យើងដឹងហើយថា អង្គការណាតូ គឺជាសម្ព័ន្ធមិត្តដែលមានអាវុធនុយក្លេអ៊ែរ ប៉ុន្តែពួកគេស្ថិតនៅក្រោមការគ្រប់គ្រងរបស់សហរដ្ឋអាមេរិកដែលមិនចង់រីកសាយភាយអាវុធទាំងនោះទៅកន្លែងផ្សេង»។
អ្នកការទូតកំពូលរបស់ប្រទេសហ្វាំងឡង់រូបនេះបាននិយាយថា «យើងមិនស្នើសុំអាវុធនុយក្លេអ៊ែរទេ ហើយក៏គ្មាននរណាម្នាក់ផ្តល់ឱ្យយើងដែរ»។
យោងតាមលោក ហាវីស្តូ បានឱ្យដឹងថា កាលពីពេលថ្មីៗនេះវាលឿនពេកក្នុងការសន្និដ្ឋានអំពីរបៀបដែលសកម្មភាពហ្វឹកហ្វឺនរបស់កងទ័ពហ្វាំងឡង់ និងការចូលរួមរបស់ខ្លួននៅក្នុងប្រតិបត្តិការអន្តរជាតិដែលនឹងមានការវិវត្តន៍បន្ទាប់ពីប្រទេសនេះចូលរួមជាមួយអង្គការណាតូ ប៉ុន្តែទោះបីជាយ៉ាងណាក៏ដោយ វាមានសុវត្ថិភាពក្នុងការសន្មត់ថា ហ្វាំងឡង់នឹងធ្វើសកម្មភាពបន្ថែមទៀតចំពោះតួនាទីនៅក្នុងគំនិតផ្តួចផ្តើមអន្តរជាតិបន្ទាប់ពីចូលរួមក្នុងសម្ព័ន្ធមិត្តណាតូ។
កាលពីថ្ងៃទី៥ ខែធ្នូ រដ្ឋាភិបាលហ្វាំងឡង់បានបញ្ជូនសេចក្តីព្រាងច្បាប់មួយទៅសភា ស្តីពីការចូលជាសមាជិកភាពអង្គការណាតូរបស់ប្រទេសនេះ។ កាលពីដើមខែកក្កដា រដ្ឋមន្ត្រីការបរទេសហ្វាំងឡង់ និងស៊ុយអែត ក៏ដូចជាឯកអគ្គរដ្ឋទូតនៃប្រទេសជាសមាជិកអង្គការណាតូចំនួន៣០ បានចុះហត្ថលេខាទៅលើពិធីសារស្តីពីការចូលជាសមាជិកនៃប្រទេសទាំងពីរ។
ទីក្រុងហ៊ែលស៊ីនគី និងទីក្រុងស្តុខុម នឹងចូលរួមជាមួយអង្គការណាតូ បន្ទាប់ពីប្រទេសទាំងអស់នៃសម្ព័ន្ធមិត្តនេះបានផ្តល់សច្ចាប័នទៅលើឯកសារទាំងនោះ៕
ប្រភព៖ ក្រសួងព័ត៌មាន
