បរទេស៖ នៅក្នុងកិច្ចប្រជុំកំពូលក្រុមប្រឹក្សាដំណើរកម្សាន្ត និងទេសចរណ៍ពិភពលោក (WTTC) លើកទី២២ នៅទីក្រុងរីយ៉ាដ ប្រទេសអារ៉ាប៊ីសាអូឌីត អាជ្ញាធរទេសចរណ៍ថៃ (TAT) បានបង្ហាញផែនការរបស់ប្រទេសនេះក្នុងការសម្រេចឱ្យបាននូវការទៅដល់ភ្ញៀវអន្តរជាតិចំនួន ១០លាននាក់នៅក្នុងឆ្នាំ២០២២។
ក្នុងនាមជាវាគ្មិនម្នាក់ក្នុងក្រុមពិភាក្សាស្តីពី «ការស្តារឡើងវិញនៃការធ្វើដំណើរកម្សាន្តនៅអាស៊ី និងប៉ាស៊ីហ្វិក» អភិបាលអាជ្ញាធរ TAT លោក យុទ្ធស័ក ស៊ូប៉ាសន បានគូសបញ្ជាក់អំពីយុទ្ធសាស្ត្រ និងវិធានការដែលអាជ្ញាធរ TAT កំពុងប្រើប្រាស់ដើម្បីសម្រេចបាននូវគោលដៅទាំងនេះ ខណៈដែលមានការព្យាករពីការសម្រេចឱ្យបានស្មើនឹង ៨០% នៃប្រាក់ចំណូលពីវិស័យទេសចរណ៍មុនពេលមានជំងឺរាតត្បាត។
បន្ទាប់ពីការបិទខ្ទប់ និងវិធានការរឹតបន្តឹងដោយសារជំងឺកូវីដ១៩ ដែលបង្កើតឱ្យមានតម្រូវការសំខាន់សម្រាប់ការធ្វើដំណើរ លោក យុទ្ធស័ក បានបញ្ជាក់ថា ទេសចរណ៍របស់ប្រទេសថៃកាន់តែមាននិរន្តរភាព មានការរួមបញ្ចូល និងមានភាពមេត្រីបរិស្ថាន។
លោកបាននិយាយបន្ថែមថា បច្ចុប្បន្ននេះ ប្រទេសថៃបានបើកដំណើរការវិញយ៉ាងពេញលេញសម្រាប់វិស័យទេសចរណ៍បរទេស ហើយកំពុងតែឃើញនូវការស្ទុះងើបឡើងវិញនៃការទៅដល់របស់ភ្ញៀវទេសចរអន្តរជាតិ។
យោងតាមលោក យុទ្ធស័ក បានឱ្យដឹងថា យុទ្ធនាការទីផ្សារ «ទស្សនាប្រទេសថៃឆ្នាំ២០២២-២០២៣៖ ទំព័រថ្មីដ៏អស្ចារ្យ» ដែលក្នុងនោះអ្នកទេសចរណ៍ត្រូវបានអញ្ជើញឱ្យទទួលយកបទពិសោធន៍នៃបទពិសោធន៍ទេសចរណ៍ដែលមានស្រាប់ និងថ្មីរបស់ព្រះរាជាណាចក្រមួយនេះ គឺជាយុទ្ធនាការទេសចរណ៍ដ៏ពេញនិយមបំផុតមួយក្នុងចំណោមអ្នកទេសចរណ៍។
អាជ្ញាធរ TAT បានបញ្ជាក់ថា គំរូសេដ្ឋកិច្ច Bio-Circular-Green ឬ BCG របស់រដ្ឋាភិបាលស្របតាមកិច្ចខិតខំប្រឹងប្រែងរបស់ព្រះរាជាណាចក្រក្នុងការលើកកម្ពស់ឧស្សាហកម្មទេសចរណ៍ប្រកបដោយការទទួលខុសត្រូវ និងនិរន្តរភាព។
ទីភ្នាក់ងារនេះបានបញ្ជាក់ថា ខ្លួននឹងបន្តលើកទឹកចិត្តឱ្យមានកិច្ចសហការបន្ថែមទៀតរវាងតួអង្គនៃវិស័យឧស្សាហកម្ម និងមិនមែនឧស្សាហកម្ម ព្រមទាំងទទួលយកនូវការច្នៃប្រឌិត ដើម្បីអភិវឌ្ឍ និងលើកកម្ពស់ផលិតផលទេសចរណ៍ប្រកបដោយចីរភាព និងបង្កើតប្រព័ន្ធអេកូអាជីវកម្មទេសចរណ៍ដែលផ្តល់អត្ថប្រយោជន៍ដល់គ្រប់ភាគីទាំងអស់៕
ប្រភព៖ ក្រសួងព័ត៌មាន
