បរទេស៖ កាលពីថ្ងៃទី១ ខែតុលា ប្រទេសថៃបានដកចេញនូវការដាក់រដ្ឋក្នុងគ្រាអាសន្នជាផ្លូវការដែលបានដាក់ចេញកាលពីក្នុងខែមីនា ឆ្នាំ២០២០ ដើម្បីប្រយុទ្ធប្រឆាំងនឹងជំងឺរាតត្បាតកូវីដ-១៩ ។ ជាមួយនឹងការដកចេញនៃការដាក់រដ្ឋក្នុងគ្រាអាសន្ននេះ វិធានការរឹតបន្តឹងដោយសារជំងឺកូវីដ-១៩ ទាំងអស់ក៏ត្រូវបានលុបចោល ឬក្លាយជាជម្រើសផងដែរ។
ចាប់ពីថ្ងៃទី១ ខែតុលា ភ្ញៀវទេសចរដែលចូលទៅកាន់ប្រទេសថៃនឹងមិនតម្រូវឱ្យបង្ហាញលទ្ធផលតេស្តអវិជ្ជមានសម្រាប់ជំងឺកូវីដ-១៩ នោះទេ។ ការពាក់ម៉ាស់ ការពិនិត្យសីតុណ្ហភាព ឬការលាងដៃ លែងជាកាតព្វកិច្ច នៅពេលដែលមនុស្សចេញទៅក្រៅ ឬទៅកន្លែងសាធារណៈទៀតហើយ។
យោងតាមសេចក្តីសម្រេចរបស់រដ្ឋាភិបាលដែលបានចេញផ្សាយកាលពីថ្ងៃទី២៣ ខែកញ្ញា ប្រទេសថៃក៏បានទម្លាក់ចំណាត់ថ្នាក់ជំងឺកូវីដ-១៩ ពី «ជំងឺឆ្លងដ៏គ្រោះថ្នាក់» ទៅជា «ជំងឺឆ្លងក្រោមការឃ្លាំមើល» វិញ ចាប់ពីថ្ងៃទី១ ខែតុលា ហើយនឹងរក្សាស្ថានភាពនេះរហូតដល់ខែកញ្ញា ឆ្នាំ២០២៣។ ជាលទ្ធផល មជ្ឈមណ្ឌលគ្រប់គ្រងស្ថានភាពជំងឺកូវីដ-១៩ ក៏ត្រូវបានរំលាយដោយស្វ័យប្រវត្តិផងដែរ។
មន្ត្រីថៃបាននិយាយថា ក្រសួងសុខាភិបាលបានបន្ទាបស្ថានភាពជំងឺកូវីដ-១៩ ចាប់តាំងពីស្ថានភាពជំងឺរាតត្បាតក្នុងប្រទេសពេលនេះមានស្ថេរភាព ហើយប្រភេទវីរុសដែលមានស្រាប់កំពុងស្ថិតក្រោមការគ្រប់គ្រង។
ទោះបីជាយ៉ាងណាក៏ដោយ ពួកគេបាននិយាយថា វានឹងមានការពិបាកក្នុងការទស្សន៍ទាយចំនួនអ្នកជំងឺនាពេលអនាគត ឬថាតើនឹងមានការផ្ទុះឡើងបន្ថែមទៀតឬក៏យ៉ាងណា ដូច្នេះអង្គភាពនានារបស់ក្រសួងនឹងបន្តតាមដានស្ថានការណ៍។ ពួកគេបាននិយាយបន្ថែមថា ករណីធ្ងន់ធ្ងរនៃជំងឺកូវីដ-១៩ នឹងបន្តទទួលបានការព្យាបាលដោយឥតគិតថ្លៃ ហើយការចាក់វ៉ាក់សាំងនឹងនៅតែដំណើរការទៅមុខ៕
ប្រភព៖ ក្រសួងព័ត៌មាន
