បរទេស៖ អ្នកនាំពាក្យក្រសួងការបរទេសចិន លោក Zhao Lijian បាននិយាយកាលពីថ្ងៃអង្គារថា ទីក្រុងតៃប៉ិ និងទីក្រុងវ៉ាស៊ីនតោន កំពុងព្យាយាមផ្លាស់ប្តូរស្ថានភាពនៅច្រកសមុទ្រតៃវ៉ាន់ ក្នុងការប៉ុនប៉ងដើម្បីជួយដល់កងកម្លាំងបំបែកខ្លួនក្នុងការទទួលបានឯករាជ្យពីកោះនេះ ដោយមានជំនួយពីសហរដ្ឋអាមេរិក។
លោក Zhao បាននិយាយនៅក្នុងសន្និសីទសារព័ត៌មានខ្លីមួយថា «វា គឺជាកងកម្លាំងបំបែកខ្លួនរបស់សហរដ្ឋអាមេរិក និងតៃវ៉ាន់ មិនមែនចិនទេ ដែលស្វែងរកការផ្លាស់ប្តូរស្ថានភាពនៅទូទាំងច្រកសមុទ្រតៃវ៉ាន់។ មានប្រទេសចិនតែមួយគត់នៅលើពិភពលោក។ តៃវ៉ាន់គឺជាផ្នែកមួយនៃប្រទេសចិន។ រដ្ឋាភិបាលនៃសាធារណរដ្ឋប្រជាមានិតចិន គឺជារដ្ឋាភិបាលស្របច្បាប់តែមួយគត់តំណាងឱ្យប្រទេសចិនទាំងមូល។ ការប៉ុនប៉ងរបស់កងកម្លាំង «ឯករាជ្យតៃវ៉ាន់» ដើម្បីទាមទារការគាំទ្រពីបរទេស រួមទាំងពីសហរដ្ឋអាមេរិកដើម្បីជំរុញរបៀបវារៈរបស់ពួកគេផងដែរនោះ គឺជាប្រភពនៃភាពតានតឹងនាពេលបច្ចុប្បន្ននៅច្រកសមុទ្រតៃវ៉ាន់»។
អ្នកនាំពាក្យរូបនោះបានសង្កត់ធ្ងន់ថា ក្រោមលេសនៃការរក្សាស្ថិរភាពនៅតំបន់ប៉ាស៊ីហ្វិកខាងលិច សហរដ្ឋអាមេរិកកំពុងព្យាយាមដោយបើកចំហដើម្បីប្រើប្រាស់តៃវ៉ាន់ក្នុងការទប់ទល់ជាមួយនឹងប្រទេសចិន។
លោក Zhao បាននិយាយបន្ថែមថា «ប្រសិនបើសហរដ្ឋអាមេរិកពិតជាចង់ដឹកនាំស្ថានការណ៍ឆ្ពោះទៅរកស្ថិរភាពកាន់តែខ្លាំងមែន វាគួរតែត្រលប់ទៅរកគោលការណ៍ចិនតែមួយ និងសេចក្តីថ្លែងការណ៍រួមទាំងបីរវាងចិន-សហរដ្ឋអាមេរិក ហើយជៀសវាងការបញ្ជូនសញ្ញាខុសឆ្គងតទៅទៀតដល់កងកម្លាំងផ្តាច់ខ្លួន «ឯករាជ្យតៃវ៉ាន់»។
សេតវិមានបាននិយាយម្តងហើយម្តងទៀតថា សហរដ្ឋអាមេរិកនៅតែប្តេជ្ញាចិត្តចំពោះគោលនយោបាយចិនតែមួយ និងមិនគាំទ្រឯករាជ្យភាពរបស់កោះតៃវ៉ាន់ ប៉ុន្តែបានទទូចឱ្យបន្តជួយដល់កោះនេះក្នុងការការពារផលប្រយោជន៍សន្តិសុខរបស់ខ្លួន។
ស្ថានការណ៍ជុំវិញកោះតៃវ៉ាន់មានការកើនឡើង បន្ទាប់ពីប្រធានសភាសហរដ្ឋអាមេរិក លោកស្រី ណាន់ស៊ី ប៉េឡូស៊ី បានទៅទស្សនកិច្ចនៅកោះនេះកាលពីដើមខែសីហា។ ប្រទេសចិនបានថ្កោលទោសចំពោះដំណើរទស្សនកិច្ចរបស់លោកស្រី ប៉េឡូស៊ី ដែលត្រូវបានចាត់ទុកថាជាកាយវិការនៃការគាំទ្រចំពោះការបំបែកខ្លួន ហើយប្រទេសចិនបានចាប់ផ្តើមសមយុទ្ធយោធាទ្រង់ទ្រាយធំនៅតំបន់ជុំវិញកោះនេះ។ ទោះជាយ៉ាងណាក៏ដោយ គណៈប្រតិភូជាន់ខ្ពស់សហរដ្ឋអាមេរិកជាច្រើនរូបទៀតបានទៅបំពេញទស្សនកិច្ចនៅកោះតៃវ៉ាន់ បន្ទាប់ពីដំណើរទស្សនកិច្ចរបស់លោកស្រី ប៉េឡូស៊ី៕
ប្រភព៖ ក្រសួងព័ត៌មាន
