បរទេស៖ រដ្ឋមន្ត្រីក្រសួងការពារជាតិចិន លោក វៃ ហ្វេងហេ បាននិយាយកាលពីថ្ងៃអង្គារថា ប្រទេសចិនបានប្តេជ្ញាចិត្តចំពោះគោលជំហរឯករាជ្យចំពោះបញ្ហារបស់អ៊ុយក្រែន និងប្រឆាំងទៅនឹងការដាក់ទណ្ឌកម្មជាឯកតោភាគីរបស់បណ្តាប្រទេសលោកខាងលិចប្រឆាំងនឹងប្រទេសរុស្ស៊ី។
លោកបាននិយាយនៅក្នុងសុន្ទរកថាតាមវីដេអូមួយទៅកាន់អ្នកចូលរួម និងភ្ញៀវនៃសន្និសីទទីក្រុងមូស្គូស្តីពីសន្តិសុខអន្តរជាតិលើកទី ១០ថា «ប្រទេសចិនប្រកាន់គោលជំហរឯករាជ្យទៅបញ្ហាអ៊ុយក្រែន។ យើងកំពុងលើកកម្ពស់ដំណើរការនៃកិច្ចចរចាដែលមានបំណងស្តារសន្តិភាពឡើងវិញ។ ប្រទេសរបស់យើងក៏ប្រឆាំងទៅនឹងទណ្ឌកម្មជាឯកតោភាគីរបស់លោកខាងលិចប្រឆាំងនឹងរុស្ស៊ីផងដែរ»។
ដូចដែលលោក វៃ ហ្វេងហេ បានបញ្ជាក់ច្បាស់លាស់ថា ទីក្រុងប៉េកាំងមានបំណងពង្រឹងទំនាក់ទំនងជាមួយបណ្តាប្រទេសនៅអឺរ៉ុប រួមទាំងផ្នែកសន្តិសុខក្នុងតំបន់ផងដែរ។ លោកបាននិយាយបន្ថែមថា «ប្រទេសចិនតែងតែតស៊ូមតិនៅក្នុងកិច្ចសន្ទនាដោយសន្តិវិធី ដោយយើងផ្តល់នូវដំណោះស្រាយផ្ទាល់ខ្លួន»។
ប្រមុខក្រសួងការពារជាតិចិនបាននិយាយថា «យើងកំពុងខិតខំប្រឹងប្រែងឥតឈប់ឈរដើម្បីកាត់បន្ថយការកើនឡើងនៃជម្លោះក្នុងប្រទេសអ៊ុយក្រែនដើម្បីជាប្រយោជន៍ដល់ស្ថិរភាពស្ថានភាពអន្តរជាតិ។ គ្រប់ភាគីពាក់ព័ន្ធត្រូវទទួលខុសត្រូវក្នុងការដោះស្រាយវិបត្តិអ៊ុយក្រែន ហើយប្រទេសចិននឹងបន្តដើរតួនាទីស្ថាបនារបស់ខ្លួនក្នុងកិច្ចការនេះ»៕
ប្រភព៖ ក្រសួងព័ត៌មាន
