បរទេស៖ យោងតាមទិន្នន័យថ្មីបំផុតដែលចេញផ្សាយដោយមជ្ឈមណ្ឌលគ្រប់គ្រង និងបង្ការជំងឺ (CDC) ដែលជាទីភ្នាក់ងារសុខភាពសាធារណៈជាតិរបស់សហរដ្ឋអាមេរិកបានឱ្យដឹងថា ករណីឆ្លងជំងឺអុតស្វាដែលបានបញ្ជាក់នៅក្នុងសហរដ្ឋអាមេរិកមានលើសពីចំនួនសម្គាល់ ១០ ០០០ករណី ដែលឈានដល់ចំនួន ១០ ៣៩២ករណីកាលពីថ្ងៃពុធ។
ផ្ទាំងទិន្នន័យរបស់ CDC បានបង្ហាញថា ករណីឆ្លងជំងឺអុតស្វាចំនួន ១ ៣៩១ករណីត្រូវបានរាយការណ៍កាលពីថ្ងៃពុធ ដែលនេះជាលើកទីមួយហើយដែល CDC បានរាយការណ៍ថាមានករណីឆ្លងជំងឺអុតស្វាច្រើនជាង ១ ០០០ករណីក្នុងរយៈពេលតែមួយថ្ងៃ ចាប់តាំងពីករណីឆ្លងដំបូងត្រូវបានរាយការណ៍កាលពីថ្ងៃទី១៧ ខែឧសភា។
រហូតមកដល់ពេលនេះ ករណីដែលបានបញ្ជាក់នៅក្នុងប្រទេសនេះនៅតែមានចំនួនជិត ៣០ភាគរយនៃចំនួនសរុបរបស់ពិភពលោក ដែលមានចំនួន ៣១ ៨០០នាក់ បើទោះបីជាចំនួនប្រជាជនរបស់ប្រទេសនេះមានចំនួនតិចជាង ៥ភាគរយនៃចំនួនប្រជាជនសរុបរបស់ពិភពលោកក៏ដោយ។
រដ្ឋបាលលោក បៃដិន កាលពីថ្ងៃព្រហស្បតិ៍សប្តាហ៍មុនបានប្រកាសអំពីជំងឺអុតស្វានេះថាជាគ្រាអាសន្នមួយផ្នែកសុខភាពសាធារណៈ ជាងមួយសប្តាហ៍បន្ទាប់ពីអង្គការសុខភាពពិភពលោកបានកំណត់ការផ្ទុះឡើងនៃជំងឺនេះថាជាគ្រាអាសន្នសកលលោក។
ក្រុមអ្នករិះគន់និយាយថា អាជ្ញាធរសហរដ្ឋអាមេរិកបានធ្វើសកម្មភាពយឺតពេក ហើយមិនបានបំពេញតម្រូវការវ៉ាក់សាំងទេ ខណៈដែលចំនួនករណីឆ្លងបន្តកើនឡើង។
ព្រឹទ្ធសមាជិករដ្ឋកាលីហ្វ័រញ៉ា លោក ស្កូតត៍ វែនណឺរ បាននិយាយថា រដ្ឋាភិបាលសហព័ន្ធអាចរក្សាស្តុកទុកនូវវ៉ាក់សាំង Jynneos ដែលជាវ៉ាក់សាំងបង្ការជំងឺអុតស្វា ដែលត្រូវបានបង្ហាញថាមានប្រសិទ្ធភាពសម្រាប់ជំងឺអុតស្វានេះ៕
ប្រភព៖ ក្រសួងព័ត៌មាន
