បរទេស៖ មន្ត្រីនគរបាលជាតិថៃ (RTP) មានបំណងចាប់ផ្តើមការសាកល្បងនៅទូទាំងប្រទេសនៃគម្រោងតំបន់សុវត្ថិភាពឆ្លាតវៃ ៤.០ (SSZ 4.0) នៅឆ្នាំក្រោយនេះ ដែលនឹងជួយកាត់បន្ថយឧក្រិដ្ឋកម្មនៅទូទាំងប្រទេស។
យោងតាមជំនួយការអគ្គស្នងការនគរបាលជាតិថៃ លោកឧត្តមសេនីយ៍ទោ ស៊ូរ៉ាឆាត ហាក់ប៉ាន បានឱ្យដឹងថា គម្រោង SSZ 4.0 ដែលរួមបញ្ចូលគ្នានូវបច្ចេកវិទ្យា ដូចជាឧបករណ៍ព្រមានអំពីឧក្រិដ្ឋកម្មភ្លាមៗ និងកាមេរ៉ាឆ្លាតវៃ ដោយមានការចូលរួមពីសាធារណជន បានទទួលនូវមតិវិជ្ជមាន បន្ទាប់ពីត្រូវបានសាកល្បងដោយស្ថានីយ៍នគរបាលចំនួន១៥ នៅក្នុងខេត្តនានាទូទាំងប្រទេស។ RTP មានបំណងពង្រីកគម្រោងនេះឱ្យបានទូទាំងប្រទេសនៅត្រឹមឆ្នាំ២០២៣ ដោយលើកឡើងពីប្រសិទ្ធភាពរបស់វាថាជាឧបករណ៍ប្រឆាំងឧក្រិដ្ឋកម្មដើម្បីការពារសាធារណៈជន។
ជំនួយការអគ្គស្នងការរូបនោះបាននិយាយថា ស្ថាប័នរដ្ឋបាលខេត្ត (PAOs) ត្រូវបានគេរំពឹងថានឹងត្រៀមថវិកាចំនួន ២០លានបាតដើម្បីគាំទ្រដល់គម្រោង SSZ 4.0 នៅតាមស្ថានីយ៍សុវត្ថិភាពនានាក្នុងខេត្តរបស់ពួកគេ។ លោកបាននិយាយបន្ថែមថា អន្តរប្រតិបត្តិការ SSZ 4.0 នឹងត្រូវបានដាក់បន្ថែមទៅក្នុងកម្មវិធី Traffy Fondue (TF) ដើម្បីជួយប្រយុទ្ធប្រឆាំងនឹងឧក្រិដ្ឋកម្ម។
ដោយទទួលបានមូលនិធិដោយក្រុមប្រឹក្សាស្រាវជ្រាវជាតិនៃប្រទេសថៃ (NRCT) គម្រោង SSZ 4.0 ផ្តល់អាទិភាពដល់សុវត្ថិភាព និងការការពារតាមរយៈកិច្ចសហការរវាងវិស័យសាធារណៈ និងឯកជន។ គម្រោងនេះបានឈ្នះពានរង្វាន់បទពិសោធល្អបំផុតនៅក្នុងសហគមន៍នគរបាល នៅក្នុងកិច្ចប្រជុំកំពូលមន្ត្រីនគរបាលពិភពលោកនៅទីក្រុងឌូបៃនៃប្រទេសអារ៉ាប់រួមកាលពីក្នុងខែមីនាឆ្នាំនេះ៕
ប្រភព៖ ក្រសួងព័ត៌មាន
