បរទេស៖ អ្នកតំណាងអចិន្ត្រៃយ៍រងរបស់រុស្ស៊ីប្រចាំការិយាល័យអង្គការសហប្រជាជាតិ និងអង្គការអន្តរជាតិផ្សេងទៀតនៅទីក្រុងហ្សឺណែវ លោក អង់ដ្រេ បេលូសូវ បានប្រាប់ក្រុមអ្នកសារព័ត៌មានថា វាមានហានិភ័យខ្ពស់ណាស់ដែលថាសម្ភារៈនុយក្លេអ៊ែរអ៊ុយក្រែននឹងធ្លាក់ទៅក្នុងដៃរបស់ក្រុមភេរវករ ប៉ុន្តែទីក្រុងមូស្គូកំពុងខិតខំប្រឹងប្រែងអស់ពីសមត្ថភាពដើម្បីការពារការវិវត្តបែបនេះ។
លោកបានចង្អុលបង្ហាញថា «ដោយសារស្ថានភាពជុំវិញស្ថានីយ៍ថាមពលនុយក្លេអ៊ែរ Zaporozhye NPP របស់អ៊ុយក្រែន បានធ្វើឱ្យមានការកើនឡើងនូវហានិភ័យនៃគ្រោះមហន្តរាយនុយក្លេអ៊ែរ ឬស្ថានភាពសង្គ្រោះបន្ទាន់ដែលនឹងនាំឱ្យមានផលវិបាកជាអវិជ្ជមាន»។ លោកបាននិយាយបន្ថែមថា «ការបាញ់ផ្លោងកាំភ្លើងធំកាលពីថ្ងៃទី៥ ខែសីហា របស់ NPP គឺជាភស្តុតាងមួយទៀតនៃការកើនឡើងហានិភ័យនេះ»។
អ្នកការទូតរូបនេះបានកត់សម្គាល់ថា «ក្នុងនាមជារដ្ឋដែលមានទំនួលខុសត្រូវ និងដឹងថាវាលំបាកប៉ុណ្ណាក្នុងការធានាសន្តិសុខនៃកន្លែងថាមពលនុយក្លេអ៊ែរនោះ រុស្ស៊ីកំពុងខិតខំប្រឹងប្រែងឱ្យអស់ពីសមត្ថភាពដើម្បីធ្វើឱ្យប្រាកដថា NPP មានសុវត្ថិភាព»។ លោកបាននិយាយបន្ថែមថា «យើងនឹងប្រើគ្រប់មធ្យោបាយដែលអាចធ្វើទៅបានដើម្បីការពារការរំលោភបំពានទៅលើសុវត្ថិភាព និងរក្សាសន្តិសុខនៅកម្រិតខ្ពស់បំផុតដោយផ្អែកទៅលើតម្រូវការរបស់ IAEA»។
លោក បេលូសូវ បានសង្កត់ធ្ងន់ថា «ចំពោះហានិភ័យនៃសម្ភារៈនុយក្លេអ៊ែរពីអ៊ុយក្រែនធ្លាក់ទៅក្នុងដៃរបស់ក្រុមភេរវករនោះ វាមិនអាចច្រានចោលបានទេថា ប្រសិនបើស្ថានភាពអាសន្ន ឬគ្រោះមហន្តរាយកើតឡើង ដោយរោងចក្រនុយក្លេអ៊ែររបស់អ៊ុយក្រែននឹងបាត់បង់ការគ្រប់គ្រង។ យើងកំពុងប្រឹងប្រែងឱ្យអស់ពីសមត្ថភាពដើម្បីទប់ស្កាត់នូវសេណារីយ៉ូបែបនេះ»៕
ប្រភព៖ ក្រសួងព័ត៌មាន
