បរទេស៖ នេះបើយោងតាមការចេញផ្សាយរបស់សារព័ត៌មានរុស្ស៊ី RT នៅថ្ងៃទី៣ ខែសីហា ឆ្នាំ២០២២នេះ បានអោយដឹងថាឯកអគ្គរដ្ឋទូតចិនប្រចាំទីក្រុងឡុងដ៍បាននិយាយនៅក្នុងសន្និសីទសារព័ត៌មានកាលពីថ្ងៃអង្គារថា អ្នកនយោបាយអង់គ្លេសគួរតែជៀសវាងការធ្វើតាមគំរូរបស់សហរដ្ឋអាមេរិក ដែលបាន “លេងជាមួយភ្លើង” នៅពេលនិយាយអំពីបញ្ហាកោះតៃវ៉ាន់។
ក្នុងនោះលោក Zheng Zeguang បាននិយាយថា សកម្មភាពបែបនេះ “ជៀសមិនរួចនឹងនាំឱ្យមានផលវិបាកធ្ងន់ធ្ងរដល់ទំនាក់ទំនងចិន-អង់គ្លេស”។ លោកបានបន្ថែមទៀតថា មន្ត្រីអង់គ្លេសគួរតែបដិសេធមិននិយាយអំពី “ការជួយតៃវ៉ាន់ការពារខ្លួន ឬទៅលេងកោះនោះ”។
អ្នកការទូតរូបនេះបានសង្កត់ធ្ងន់ថា ដំណើរទស្សនកិច្ចរបស់ប្រធានសភាអាមេរិក លោកស្រី Nancy Pelosi ទៅកាន់ទីក្រុងតៃប៉ិ “បានរំលោភបំពានយ៉ាងធ្ងន់ធ្ងរលើអធិបតេយ្យភាព និងបូរណភាពទឹកដីរបស់ប្រទេសចិន ហើយបានប៉ះពាល់យ៉ាងធ្ងន់ធ្ងរដល់សន្តិភាព និងស្ថិរភាពនៅទូទាំងច្រកសមុទ្រតៃវ៉ាន់”។ ហើយលោក Zheng បានអំពាវនាវឲ្យចក្រភពអង់គ្លេស «កុំធ្វើតាមអាមេរិក»៕
