បរទេស៖ អ្នកនាំពាក្យក្រសួងការបរទេសចិន លោក Zhao Lijian បាននិយាយកាលពីថ្ងៃចន្ទថា អាជ្ញាធរចិននឹងចាត់វិធានការប្រកបដោយប្រសិទ្ធភាព ប្រសិនបើប្រធានសភាតំណាងរាស្ត្រសហរដ្ឋអាមេរិក លោកស្រី ណាន់ស៊ី ប៉េឡូស៊ី ធ្វើទស្សនកិច្ចទៅកាន់កោះតៃវ៉ាន់។
លោកបានបញ្ជាក់នៅក្នុងសន្និសីទសារព័ត៌មានខ្លីមួយថា «ប្រសិនបើលោកស្រី ប៉េឡួស៊ី ធ្វើទស្សនកិច្ចទៅកាន់កោះតៃវ៉ាន់ វានឹងក្លាយជាការជ្រៀតជ្រែកទាំងស្រុងនៅក្នុងគោលនយោបាយក្នុងស្រុករបស់ប្រទេសចិន ហើយនឹងនាំឱ្យមានផលវិបាកយ៉ាងធ្ងន់ធ្ងរ»។ លោកបាននិយាយបន្ថែមថា «កងទ័ពរំដោះប្រជាជនចិននឹងមិនអង្គុយនៅស្ងៀមទេ»។
យោងតាមអ្នកការទូតរូបនេះបានឱ្យដឹងថា ដំណើរទស្សនកិច្ចរបស់លោកស្រី ប៉េឡូស៊ី ទៅកាន់កោះតៃវ៉ាន់នឹងធ្វើឱ្យស្ថានការណ៍នៅច្រកសមុទ្រតៃវ៉ាន់មានអស្ថិរភាព និងប៉ះទង្គិចដល់ទំនាក់ទំនងរវាងចិន និងសហរដ្ឋអាមេរិក។ លោកបានបញ្ជាក់ថា «ប្រទេសចិននឹងចាត់វិធានការយ៉ាងម៉ឺងម៉ាត់ និងមានប្រសិទ្ធភាព»។
នៅពេលមុននេះ ប្រព័ន្ធផ្សព្វផ្សាយបានរាយការណ៍ថា លោកស្រី ប៉េឡូស៊ី ដែលជាមន្ត្រីជាន់ខ្ពស់បំផុតលំដាប់ទីបីនៅក្នុងឋានានុក្រមរដ្ឋរបស់សហរដ្ឋអាមេរិក គ្រោងនឹងទៅបំពេញទស្សនកិច្ចទៅកាន់កោះតៃវ៉ាន់នៅក្នុងខែសីហានេះ។ វាត្រូវបានរាយការណ៍ដោយសារព័ត៌មាន The Financial Times និង Politico ។ យោងតាមការរាយការណ៍នោះបានឱ្យដឹងថា លោកស្រីគ្រោងនឹងធ្វើដូច្នេះកាលពីដើមខែមេសា ប៉ុន្តែត្រូវបានចោទប្រកាន់ថាមិនបានទៅវិញដោយសារតែបញ្ហាជំងឺកូវីដ-១៩ ។ ដំណើរទស្សនកិច្ចនេះនឹងក្លាយជាដំណើរទស្សនកិច្ចលើកដំបូងរបស់ប្រធានសភាតំណាងរាស្ត្រសហរដ្ឋអាមេរិកទៅកាន់កោះតៃវ៉ាន់ក្នុងរយៈពេល ២៥ឆ្នាំចុងក្រោយនេះ។
កាលពីថ្ងៃអាទិត្យ គណៈប្រតិភូដែលដឹកនាំដោយលោកស្រី ប៉េឡូស៊ី បានចាកចេញទៅកាន់តំបន់អាស៊ីក្នុងគោលបំណងទៅបំពេញទស្សនកិច្ចនៅក្នុងប្រទេសសិង្ហបុរី ម៉ាឡេស៊ី កូរ៉េខាងត្បូង និងជប៉ុន។ អ្នកនយោបាយរូបនេះបានបដិសេធមិនបញ្ជាក់ថា តើលោកស្រីមានគោលបំណងទៅទស្សនាទីក្រុងតៃប៉ិក្នុងអំឡុងពេលដំណើរទស្សនកិច្ចនៅអាស៊ីប៉ាស៊ីហ្វិករបស់លោកស្រីនេះដែរឬក៏យ៉ាងណានោះទេ។
កោះតៃវ៉ាន់ត្រូវបានគ្រប់គ្រងដោយរដ្ឋបាលក្នុងតំបន់របស់ខ្លួនចាប់តាំងពីឆ្នាំ១៩៤៩ មក នៅពេលដែលកងកម្លាំងគួមីនតាងនៅសេសសល់ដែលដឹកនាំដោយឈៀង កៃសៀក (ឆ្នាំ១៨៨៧-១៩៧៥) បានភៀសខ្លួនទៅកាន់កោះនេះបន្ទាប់ពីទទួលរងបរាជ័យក្នុងសង្គ្រាមស៊ីវិលរបស់ប្រទេសចិន។ ចាប់តាំងពីពេលនោះមក កោះតៃវ៉ាន់បានរក្សាទង់ជាតិ និងនិមិត្តសញ្ញាមួយចំនួនទៀតនៃសាធារណរដ្ឋចិនដែលមាននៅក្នុងប្រទេសចិនដីគោក មុនពេលបក្សកុម្មុយនិស្តឡើងកាន់អំណាច។ ទីក្រុងប៉េកាំងបានចាត់ទុកកោះនេះជាខេត្តមួយក្នុងចំណោមខេត្តរបស់ខ្លួន ហើយគោលជំហរនេះត្រូវបានគាំទ្រដោយប្រទេសភាគច្រើន រួមទាំងរុស្ស៊ីផងដែរ៕
ប្រភព៖ ក្រសួងព័ត៌មាន
