បរទេស៖ ឆ្នេរចំនួន២ របស់ប្រទេសថៃបានជាប់ចំណាត់ថ្នាក់កំពូលទាំង២០ នៃឆ្នេរសមុទ្រដ៏ស្រស់ស្អាតបំផុតនៅលើពិភពលោកនាពេលថ្មីៗនេះ។ ជាការឆ្លើយតប លោកនាយករដ្ឋមន្ត្រីបានប្រាប់ដល់បណ្តាទីភ្នាក់ងារពាក់ព័ន្ធនឹងវិស័យទេសចរណ៍ឱ្យបន្តរៀបចំការទៅដល់របស់ភ្ញៀវទេសចរបរទេស។
កាសែតដេលីស្តាររបស់ចក្រភពអង់គ្លេសបានរាយការណ៍អំពីចំណាត់ថ្នាក់នាពេលថ្មីៗនេះសម្រាប់ឆ្នេរសមុទ្រស្អាតបំផុតទាំង២០ របស់ពិភពលោក។ ចំណាត់ថ្នាក់នេះត្រូវបានបង្កើតឡើងដោយការវិភាគទៅលើការបង្ហោះរូបភាព និងវីដេអូនៅលើបណ្តាញសង្គមអ៊ីនស្តារក្រាម និងចំនួនអត្ថបទរបស់ក្រុមហ៊ុន Google ដែលមានពាក្យ «ស្រស់ស្អាត» សម្រាប់ឆ្នេរសមុទ្រនីមួយៗ។
ឆ្នេរវេននីសស៍របស់រដ្ឋកាលីហ្វ័រញ៉ាបានជាប់ចំណាត់ថ្នាក់កំពូលគេ ខណៈដែលឆ្នេរសាន់រ៉ាយរបស់ប្រទេសថៃនៅក្នុងខេត្តសាទុនជាប់ចំណាត់ថ្នាក់ទី៦ និងឆ្នេរសមុទ្រម៉ាយ៉ាបេយនៅក្នុងខេត្តក្រាប៊ីជាប់ចំណាត់ថ្នាក់ទី១២។
នាយករដ្ឋមន្ត្រីថៃ លោក ប្រាយុធ ចាន់អូចា បាននិយាយថា ចំណាត់ថ្នាក់នេះឆ្លុះបញ្ចាំងពីប្រជាប្រិយភាពរបស់ប្រទេសថៃក្នុងចំណោមអ្នកទេសចរទូទាំងពិភពលោក។ ដូច្នេះហើយ លោកបានរំលឹកសារជាថ្មីដល់បណ្តាទីភ្នាក់ងារពាក់ព័ន្ធនឹងវិស័យទេសចរណ៍ឱ្យត្រូវរៀបចំការទទួលភ្ញៀវទេសចរបរទេសតាមផែនការឆ្នាំ២០២២ ដើម្បីជំរុញវិស័យទេសចរណ៍។
ឆ្នាំ២០២២ គឺជាឆ្នាំសម្រាប់ការផ្សព្វផ្សាយទេសចរណ៍ថៃ ហើយបច្ចុប្បន្នរដ្ឋាភិបាលកំពុងអនុវត្តយុទ្ធនាការទស្សនាប្រទេសថៃឆ្នាំ២០២២៖ ជំពូកថ្មីៗដ៏អស្ចារ្យ។ ទិដ្ឋភាពថ្មីនៃបទពិសោធន៍ទេសចរណ៍ គឺជាការផ្តោតសំខាន់នៃយុទ្ធនាការនេះ។ «ជំពូកថ្មីៗដ៏អស្ចារ្យ» នឹងស្វែងរកបន្ថែមទៀតនូវសារៈសំខាន់សម្រាប់ការធ្វើដំណើរនីមួយៗដែលធ្វើឡើងដោយអ្នកទេសចរ ដែលត្រូវបានបដិសេធឱកាសធ្វើដំណើរដោយសារជំងឺរាតត្បាតកូវីដ-១៩។
នាយឧត្តមសេនីយ៍ ប្រាយុធ ក៏បានសម្តែងការគាំទ្រចំពោះកិច្ចសហប្រតិបត្តិការពហុវិស័យលើវិស័យទេសចរណ៍ផងដែរ ក្នុងគោលបំណងទាក់ទាញភ្ញៀវទេសចរឱ្យបានកាន់តែច្រើន និងពង្រីកកិច្ចសហប្រតិបត្តិការឱ្យមានការពាក់ព័ន្ធជាមួយប្រជាជាតិដទៃទៀត។ លោកបានលើកឡើងអំពីមហោស្រពឥណ្ឌាភាគឦសាននៅទីក្រុងបាងកកនៅចុងខែនេះជាឧទាហរណ៍។ ព្រឹត្តិការណ៍នេះនឹងធ្វើឡើងនៅអគារពាណិជ្ជកម្មសិនត្រលវើលនៅថ្ងៃទី៣០ និងថ្ងៃទី៣១ ខែកក្កដា៕
ប្រភព៖ ក្រសួងព័ត៌មាន
