បរទេស៖ ការិយាល័យសារព័ត៌មានរបស់ក្រុមប្រឹក្សាសន្តិសុខបានរាយការណ៍កាលពីថ្ងៃអង្គារថា ក្រុមប្រឹក្សាវិទ្យាសាស្ត្រនៃក្រុមប្រឹក្សាសន្តិសុខរុស្ស៊ីបានពិភាក្សាគ្នាអំពីយុទ្ធសាស្ត្ររបស់ទីក្រុងមូស្គូឆ្ពោះទៅរកលោកខាងលិច ដោយគិតគូរពីផលប្រយោជន៍សន្តិសុខជាតិ និងលទ្ធផលនៃកិច្ចប្រជុំកំពូលនៅទីក្រុងម៉ាឌ្រីតរបស់អង្គការណាតូកាលពីក្នុងខែមិថុនា។
ការិយាល័យសារព័ត៌មានបាននិយាយនៅក្នុងសេចក្តីថ្លែងការណ៍មួយបន្ទាប់ពីកិច្ចប្រជុំរបស់ក្រុមការងារនៃក្រុមប្រឹក្សាសន្តិសុខ ស្តីពីបញ្ហាសកលលោក និងសន្តិសុខអន្តរជាតិថា «ក្រុមអ្នកជំនាញនៃក្រុមប្រឹក្សាសន្តិសុខរបស់រុស្ស៊ីបានចង្អុលបង្ហាញពីការបង្កើនកិច្ចខិតខំប្រឹងប្រែងរបស់អង្គការណាតូក្នុងគោលបំណងបង្កើតការគំរាមកំហែងផ្នែកយោធាដោយផ្ទាល់ចំពោះប្រទេសរុស្ស៊ី»។
សេចក្តីថ្លែងការណ៍នោះបាននិយាយថា កិច្ចប្រជុំកំពូលនៅទីក្រុងម៉ាឌ្រីដ «បានបង្ហាញសារជាថ្មីម្តងទៀតថា សម្ព័ន្ធភាពអាត្លង់ទិកខាងជើង នៅតែបន្តជាយន្តការនៃការដាក់ផលប្រយោជន៍របស់សហរដ្ឋអាមេរិកទៅលើសមូហភាពលោកខាងលិច»។
ក្រុមប្រឹក្សាសន្តិសុខរុស្ស៊ីបាននិយាយថា «វាគួរតែត្រូវបានកត់សម្គាល់ថា ផ្ទុយទៅនឹងសេចក្តីថ្លែងការណ៍របស់ថ្នាក់ដឹកនាំអង្គការណាតូ សកម្មភាពរបស់សម្ព័ន្ធមិត្តមិនបានរួមចំណែកដល់ការធានាស្ថិរភាពអន្តរជាតិ និងការពង្រឹងសន្តិសុខនៃប្រទេសជាសមាជិករបស់ខ្លួននោះទេ»។
កិច្ចប្រជុំនោះបានពិភាក្សាគ្នាទៅលើសំណើដែលគួរពិនិត្យមើលនៅក្នុងស្ថាប័ននានារបស់រដ្ឋាភិបាល។ កិច្ចប្រជុំនោះត្រូវបានដឹកនាំដោយអនុលេខាធិការក្រុមប្រឹក្សាសន្តិសុខរុស្ស៊ី លោក អាឡិចសាន់ដឺរ វេណេឌីកតូវ៕
ប្រភព៖ ក្រសួងព័ត៌មាន
