បរទេស៖ ករណីឆ្លងថ្មីប្រចាំថ្ងៃនៃជំងឺកូវីដ-១៩ របស់ប្រទេសកូរ៉េខាងត្បូងបានបន្តលើសពី ៤០ ០០០នាក់កាលពីថ្ងៃអាទិត្យ ដោយសារតែការរីករាលដាលនៃប្រភេទរងទម្រង់បម្លែងថ្មីអូមីក្រុង ដែលឆ្លងខ្លាំង។
ទីភ្នាក់ងារត្រួតពិនិត្យ និងបង្ការជំងឺកូរ៉េ (KDCA) បាននិយាយថា ប្រទេសនេះបានរាយការណ៍ពីករណីឆ្លងថ្មីនៃជំងឺកូវីដ-១៩ ចំនួន ៤០ ៣៤២នាក់ ដោយរួម ៣០៥នាក់ជាករណីនាំចូលពីក្រៅប្រទេស ដែលនាំឱ្យចំនួនករណីសរុបកើនឡើងដល់ ១៨ ៧៦១ ៧៥៧នាក់។
តួលេខកាលពីថ្ងៃអាទិត្យ គឺធ្លាក់ចុះបន្តិចពីចំនួន ៤១ ៣១០នាក់កាលពីថ្ងៃសៅរ៍។ ប៉ុន្តែវាបានក្លាយជាតួលេខខ្ពស់បំផុតសម្រាប់ថ្ងៃអាទិត្យចាប់តាំងពីថ្ងៃទី២៤ ខែមេសា នៅពេលដែលករណីឆ្លងបានឡើងដល់ចំនួន ៦៤ ៦៩៦នាក់។
គិតត្រឹមម៉ោង៩:០០ កាលពីថ្ងៃអាទិត្យ ប្រទេសកូរ៉េខាងត្បូងបានរាយការណ៍ពីករណីឆ្លងប្រចាំថ្ងៃចំនួន ២៥ ០៧៩នាក់ ដែលប្រហែលទ្វេដងនៃអ្វីដែលបានកើនឡើងក្នុងអំឡុងពេលដូចគ្នាកាលពីសប្តាហ៍មុន។ ករណីឆ្លងប្រចាំថ្ងៃត្រូវបានរាប់រហូតដល់ពាក់កណ្តាលអធ្រាត្រ ហើយប្រកាសនៅព្រឹកថ្ងៃបន្ទាប់។
ប្រទេសនេះមានការកើនឡើងគួរឱ្យកត់សម្គាល់នៃករណីឆ្លងចាប់តាំងពីចុងខែមិថុនាមក ដោយសារតែការរីករាលដាលនៃប្រភេទរង BA.5 នៃទម្រង់បម្លែងថ្មីអូមីក្រុង ចំពេលដែលកំពុងមានការបន្ធូរបន្ថយវិធានការទប់ស្កាត់ជំងឺរាតត្បាតនេះ។
ការរាប់ប្រចាំថ្ងៃបានកើនឡើងដល់ជាង ១០ ០០០នាក់កាលពីថ្ងៃទី២៩ ខែមិថុនា ជាលើកដំបូងក្នុងរយៈពេលប្រហែល ៣សប្តាហ៍មុនពេលកើនឡើងដល់ជាង ២០ ០០០នាក់កាលពីថ្ងៃទី៩ ខែកក្កដា និងបន្ទាប់មកមានលើសពី ៤០ ០០០នាក់កាលពីថ្ងៃពុធ។ ចំនួនអ្នកឆ្លងកាលពីថ្ងៃព្រហស្បតិ៍ និងថ្ងៃសុក្រ មានចំនួន ៣៩ ១៨៦នាក់ និង ៣៨ ៨៨២នាក់រៀងៗគ្នា។
KDCA បានរាយការណ៍ពីករណីស្លាប់ដោយសារជំងឺកូវីដ-១៩ ចំនួន ១៤នាក់បន្ថែមកាលពីថ្ងៃអាទិត្យដោយធ្វើឱ្យចំនួនអ្នកស្លាប់សរុបមានចំនួន ២៤ ៧៤២នាក់។ អត្រាអ្នកស្លាប់មានចំនួន ០,១៣ភាគរយ។ អ្នកជំងឺធ្ងន់ធ្ងរមានចំនួន ៧១នាក់ ដោយកើនពីថ្ងៃមុនដែលមានចំនួន ៧០នាក់៕
ប្រភព៖ ក្រសួងព័ត៌មាន
